Imphal, Risaw:
Ki pulit jong ka Manipur ki la ïoh ban kem ïa uwei u dkhot ba la treikam bha jong ka kynhun Kanglei Yawol Kanna Lup (KYKL) na Imphal West District uba la donkti ha ki kam dawa pisa na ki riewpaidbah. Nalor kane, ki pulit ki la ïathuh ba ki la ïoh ruh ban kurup ïa kawei ka pistol 9mm bad uwei u Magazine ba la dap kuli, ka Mobile Phone bad ka pisa kaba T. 60,000 ha kaba ki pulit ki la pynshisha ba ka la dei ka pisa ba ki la dawa.
Ha kaba ïadei bad kane, ka la don ka jingleit khynra bad ka jingleit thwet lehnoh ba la pynlong da ki shipai ka tnat ïada ri ha ki thaiñ ba la tip shai ba la jia kum kine ki kam kiba don ha Imphal East, Imphal West, Churachandpur, Thoubal, Bishnupur bad Kakching distrik.
Ha ka por ba ka la don ka jingpyntreikam, ar tylli ki tiar siat kiba kynthup ïa ka SLR-02 la ïoh ban kurup ha Imphal-East distrik, lai tylli ki .303 Rifles-03 bad ar tylli ki bom pynbthei ba la shna hi na Kakching distrik. Ka la don ka jingpyntreikam pyrkhing ha kine ki thaiñ.
Ki la don baroh kumba 133 tylli ki jaka pynap shrip jong ki pulit ba la buh ha kiba bun ki distrik jong ka Manipur, ha baroh ar kata ha ki thaiñ ba long lum bad kiba long them. Ha kaba ïadei bad kum kine ki jingpyntreikam, ki pulit ki la ïoh ban kem haduh 2047 ngut ki briew kiba la donkti ha ki kam beaiñ ha kiba bun ki distrik jong ka jylla.
