Aizawl, Risaw:
U nongïalam jong ka seng Congress Rahul Gandhi hynnin ka sngi u la sdang ïa ka jingïalang paidbah jong ka seng ha ka jylla Mizoram ka ban sa pynlong ïa ka ilekshon.
U Gandhi, uba la poi ha Aizawl na ka bynta ka jingleit jngoh ba ar sngi, u la pynlong ïa ka ‘padyatra’ (ka jingïaid kjat) na ka thaiñ Chanmari kaba don ha ka nongbah sha Treasury Square.
U la ai khublei ïa ki nongkyrshan jong ka seng bad ïa ki riewpaidbah. La ïohi ba u la kaweh kti ïa ki briew kiba ap bad ïeng na arliang ka surok kaba u ïaid.
U la ïakhublei kti bad ïakren bad kito kiba la leit hajan ban ïakren bad u. Kumba la pynbeit, la ong ba u Gandhi u la leit ban ïakynduh bad ïakren sani bha bad ki khynnah pule.
Ha ka step kaba bud, kata mynta ka sngi, un sa ïakynduh ïa ki nongïalam jong ka seng Congress jong ka jylla bad ai jingkren ha ka jingïalang bad ki nongthoh khubor.
Un sa leit ruh sha Lunglei bad ban ai jingkren ha ka jingïalang paidbah hashwa ba un leit phai sha Delhi lyngba na Agartala.
Ka jingleit jngoh jong u Gandhi ka la long ha ka sien kaba nyngkong jong ka jingleit jngoh ki heh nongïalam jong ka seng Congress hadien ka jingpynbna ha ka taïew ba la lah ban pynlong ïa ka ilekshon Assembly ha ka jylla ha ka 7 tarik, Naiwieng jong une u snem.
Ka seng ka la khmih lynti ban pyllait shen ïa ka thup kyrteng kaba nyngkong jong ki kyrtong ki ban ïakhun ha ka ilekshon na ka bynta ka jingjied ïa 40 ngut ki dkhot sha ka ïingdorbar.
