Aizawl, Risaw
U Myntri Rangbah jong ka Mizoram u Zoramthanga ha kine ki khyndiat sngi ba la leit u la pyntikna ba ka seng jong u ka Mizo National Front, kan sa wan biang ha ka bor synshar bad kan sa ïoh rah ïa ka jingjop ha ki 25-35 tylli ki konstitwensi ha ka ilekshon ka ban sa long na ka bynta ban jied ïa ki 40 ngut ki dkhot jong ka ïingdorbar.
U la pynshisha ruh da kaba ong ba ka seng Congress, ïa kaba la shah pynrem noh ha ka seng MNF ha ka jingïakhun ïa ka ilekshon ha u snem 2018, kan ym ïoh jingjop ei ei ha ka jingïakhun ïa ka ilekshon ha une u snem ka ban sa long ha ka 7 tarik, Naiwieng.
Na ka liang u Myntr Rangbah u la ong ba u la bthah ïa ki nongïalam jong ka seng hapoh ka jylla ba kan nang pynjur ïa ka jingtrei shitom kumba long ha ki snem ba la leit ha ka ban trei na ka bynta ka seng khnang ba sa shisien pat yn ïoh ban kheit ïa u soh uba thiang ha ka jingïakhun ilekshon.
“Ngi la bunkam ha kaba ïadei bad ki jingpynkhreh na ka bynta ka ilekshon Assembly ka ban sa long. Ngi la don ka jingkyrmen na ka bynta ban ïoh ïa ka jingjop bad ban ïoh thaw sorkar biang…Nga la khmih lynti ban ïoh ïa ka jingjop ha ki 25 bad 35 tylli ki konstitwensi,” la ong u Zoramthanga ha ka jingïakren bad ki nongthoh khubor.
