Guwahati, Risaw:
Ha ka jingbteng ban pynlong ïa ka jingpyntreikam, ka kynhun Special Task Force (STF) Assam ka la wanrah ïa ka jingjop ha kaba ka la ïoh ban kem ïa 12 ngut ki nongkhaïi drok kaba kynthup ïa 4 ngut ki kynthei ha ka nongbah Guwahati.
Kane ka jingpyntreikam ka la long ha ka thaiñ ba don ka jaka pynïeng kali ha ka jaka sangeh rel jong ka Guwahati Railway Station kaba hap hapoh ka jingpeit jong ki pulit ka Panbazar.
Hadien ba la ïoh jingtip halor ka jingdon jong kine ki briew, ka kynhun STF ka la pynlong ïa ka jingleit khynra ha ka miet jong ka Lah Sngi U Blei.
Kane ka jingtreikam jong ki ka la ïarap shibun ha ka ban ïoh kem ïa kine ki 12 ngut ha ryngkat u drok. Ka jingtohkit ïa kine ka dang ïaid shakhmat.
