Aizawl, Risaw:
U nongïalam jong ka seng Congress u Rahul Gandhi ha ka Lah Sngi U Blei u la ong ba ki briew ki la shah pynïap ha palat san bnai ha Manipur, hynrei u Myntri Rangbahduh um shym don por ban leit jngoh ïa ka jylla, bad ka long kaba sngewphylla ban ïohi ba ka sorkar jong ngi ka phai khmat shaphang kaei kaba la jia ha Israel.
U Gandhi, ha ka por ba u la ai jingkren ha ka jingïalang paidbah kaba la long ha Aizawl, u la ong, “Ngam sngewthuh shisha balei ba u Myntri Rangbahduh um leit sha Manipur. Ka long ka jinglehraiñ na ka bynta u nongïalam jong ka ri.” Ki riewlum, ki ritpaid bad ki Dalit ki sngew ba kim suk ne sngewhun hapoh ka jingsynshar jong ka seng BJP bad kane ka dei ka jingthombor ïa ka jingthmu jong ka ri.
