Aizawl, Risaw:
Ka seng Congress ha ka Lah Sngi U Blei ka la pyllait ïa ka thup kyrteng jong 39 ngut ki kyrtong ban ïakhun ha ka ilekshon Assembly ka ban sa long ha Mizoram.
Ka seng Congress ka la pynïakhun ïa u Lalsanglura Ralte na Aizwal East-I konstitwensi, ïa kaba mynta la bat da u President jong ka Mizo National Front (MNF) bad u Myntri Rangbah u Zoramthanga. Katba u heh ka Mizoram Congress Committee u Lalsawta u la shah pynïakhun na Aizawl West-III (ST), u Lalnunmawia Chuaungo pat u la ïoh tiket ban ïakhun na Aizawl North-I (ST).
Shuh shuh la ïathuh ba u Lalrindika Ralte un sa ïakhun na Hachhek (ST), u Lalhmingthanga Sailo na Dampa (ST) bad u Lalrinmawia na Aizawl North-II.
Ki heh nongïalam jong ka seng ki la don jingthmu ban nang pynkhlaiñ shuh shuh ïa ki rukom pyntreikam khnang ban lah ban ïoh ïa ka jingjop ha ka jingïakhun ïa ka ilekshon ban wan.
Kane ka jingpynbna kyrteng ka la long ha ka por jong ka jingleit jngoh ba arsngi jong u nong-ïalam jong ka seng Congress u Rahul Gandhi ïa ka jylla ka ban pynlong ïa ka ilekshon ban ïalap na ka bynta ki kyrtong jong ka seng.
