Gangtok, Risaw:
U Myntri Rangbah jong ka Sikkim u PS Tamang ha ka Lah Sngi U Blei u la pynbna ban ai ïa ar tylli ki skhim shna ïing na ka bynta kito kiba la duhnoh ïa ki ïing ha ka jingshlei um kaba la ktah jur ïa ka jylla.
Ka sorkar jylla ka la pynbiang ruh mar T. 10,000 sha ki khynnah skul kiba la duh noh ïa ki tiar pule jong ki bad palat T. 5,000 sha kito kiba sah ïing wai, la ong u Tamang.
Ka sorkar Sikkim kumba ka la rai ka la dep sam mar T. 10,000 ka jingïarap pisa sha ki nongbylla kiba la pynrung kyrteng hapoh ka Building and Other Construction Workers (BOCW) Welfare Board ha ka sngi U Blei kum shi bynta ban ai jingïarap halor ka jingshah ktah jur jong ki na ka jingshlei jong ka Glacial Lake Outburst Flood (GLOF) ha ki bynta jong ka wah Teesta kaba don ha Gangtok namar ka jingjur palat jong u slap.
Kumba la lum jingkheiñ la ong ba ki la don palat 8,733 ngut ki nongbylla kiba la shah ktah na ka jingshlei um ha kaba kine ki la ïoh da ki Cheque ïa kiba la ai da u Myntri Rangbah u Prem Singh Golay ha ka prokram ba la pynlong na ka bynta ban sam ïa ki jingai jingïarap sha ki lanot ba la pynlong ha Chintan Bhawan kaba don ha Gangtok.
Kine ki nongbylla ki la trei ha kiba bun ki jaka treikam jong ki tnat sorkar, kum ha ka ban shna ïa ki ïing kynthup ïa kiba shi mala bad kiba bun mala, ïa ki surok bad ki jingkieng, bad hapoh ka tnat sam um, kiba hap hapoh ka jingkhmih jong ka State Labour Department.
U Myntri Rangbah ha ka jingai jingkren jong u u la ong ba ka pisa ba la lum na ka bynta ban ai jingïarap sha ki lanot ka dei kaba la ai da ka sorkar jylla ha kaba kane ka la kot sha palat T. 8.70 klur.
U la ong, “Kiba bun ki briew ki la duhnoh ïala kajong ka jingim ha ka jingshlei um, kine ki dei ki por ba kiba bun ki lanot ki ïakynduh jingeh naba ki nongbylla jong ngi ruh ki la duh mynsiem ïohba ki ïap khamtam namar ba ki shong ki sah harud jong ka wah. Kiba bun na ki nongbylla mynta ki la ïoh jingïarap bad jingkyrshan na ka sorkar jylla.”
