Guwahati, Risaw:
Uwei u nongshong shnong jong ka Bangladesh u la shah kem ha ki pulit jong ka South Salmara-Mankachar ha ka janmiet jong ka 15 tarik, Risaw halor ka jingwan rungtuh jong u sha ki bynta jong kane ka ri.
Une u briew u la pyndonkam da ki kot sakhi thok kum u nongthep Vote ha Mankachar konstitwensi. Kane ka jingïohkem ïa u ka la long 16 snem hadien ba u la sah beaiñ.
Ïa une u briew uba la shahkem la tip kyrteng kum u Mizanur, uba dei u nongshong shnong jong ka Phulbari ha Kurigram distrik jong ka Bangladesh.
U Mizanur u la ïaid lyngba ki bynta jong ka ri khlem ki kot ki sla kiba biang ha u snem 2007, ha kaba u la ïoh jaka sah ha ka ïing jong u Sonab Ali ha ka shnong Bhurakata, ha kaba u la pynlut por ban sah ha kane ka ïing haduh kine ki sngi.
Ka jingwan rungtuh jong u Mizanur sha ki bynta jong kane ka ri ha Mankachar ka la long namar ba u la ïathoh bad ka khun jong u Ali, ha kaba u la ïarap ïa u ban pynïoh ïa ki jingdonkam baroh ban long u nongshong shnong jong ka thaiñ.
Na ka bynta ban pynïoh ïa kane ka jingthrang jong u, u Ali u la pynïoh da ki kot ki sla ba la sakhi thok kum u nongshong shnong jong kane ka ri kynthup ha ka ban pynrung ïa ka kyrteng jong u kum u nongthep vote na kane ka konstitwensi, ha kaba la leh thok ha kiba bun ki bynta ban pynshisha ba u dei u nong India.
