Aizawl, Risaw:
Ki shipai jong ka tnat Assam Rifles ki la ïoh ban kem ïa u nong Myanmar ha ryngkat shibun u drok uba la kot sha ka T. 45 klur na ka jaka ban pynlong ïa ka ilekhson ha Mizoram, la ïathuh ki heh pulit.
Ki shipai Assam Rifles ki la pyntreikam mar-mar hadien ba ki la ïoh jingtip shaphang kane ka jingdon jong ki nongkhaïi drok, ha kaba na ka jingpyntreikam jong ki la ïoh ban kem ïa u nong Myanmar bad ïoh kurup kumba 15 kilo u Methamphetamine Tablets uba la kot sha ka T. 45 klur ha ka thaiñ Zokawthar kaba don ha ka distrik Champhai kaba don ha ki bynta khappud ha ka miet jong ka sngi Saitjaiñ.
Ïa une uba la shahkem la aiti sha ki pulit jong ka Champhai na ka bynta ban pynlong ïa ka jingtohkit kaba bniah hapoh ka jingtreikam jong ka Narcotics Drugs and Psychotropic Substances Act.
