Aizawl, Risaw:
Ka seng Aam Aadmi Party shen kan sa pynbna ïa ka jingdon jong ki konstitwensi ha kaba kan sa ïakhun ha ka ilekshon Assembly ha Mizoram bad kumjuh ïa ki kyrteng jong kine ki konstitwensi hadien ka jingkhmih bniah.
Ha kine ki khyndiat sngi ba la leit, ka seng ka la pynbna ba ka la tikna ban sa ïakhun ha ka ilekshon Assembly ha ka jylla Mizoram.
Ha ka jingai jingkren sha ki nongthoh khubor, u nongpynïaid jong ka seng ha ka jylla ba shaphang Shatei-lam-Mihngi jong ka ri u Rajesh Sharma u la ong ba ïa kane ka rai la wanrah na ka bynta ban nang pynïar shuh shuh ïa ki rukom treikam jong ka seng bad ban ïakhun ïa ka ilekshon ha ki jylla ba shaphang Shatei-lam-Mihngi ha ka jingïalang ba la long hashwa hapoh ka jingpynïaid jong u nongai jingmut jong ka seng AAP ha ka ri u Arvind Kejriwal.
“Yn sa thaw ïa ka kynhun ba la ïatreilang bad ka kynhun jong ka seng ha North-East na ka bynta ki rukom pyntreikam ha ka ban nang pynsuhthied shuh shuh ïa ka seng,” u la ong.
U Sharma u la ong ba ki briew ha ka bynta ba shaphang Shatei-Mihngi ki la ïakhun tyngeh ban ïakren bad wanrah ïa ki mat ba ïadei bad ka jingnang jingstad, ka koit ka khiah, ban ïakhun pyrshah halor ka jingkiewdor kiba bun ki mar ki mata bad kumjuh ka jingbym ïohkam-ïohjam bad ki la ngeit ba ka seng AAP kan sa pynbiang ïa ki lad ki lynti ha kaba ïadei bad kine ki jingeh.
