Imphal, Risaw:
U Justice Siddharth Mridul hynnin ka sngi u la bam smai kum u Chief Justice jong ka Manipur High Court.
Ïa u Chief Justice uba dang shah thung thymmai la pynbamsmai da ka Lat jong ka Manipur ka Anusuiya Uikey ha Raj Bhawan ha Imphal. Ha ka lympung jong ka jingpynbamsmai la leit ban ïashim bynta da u Myntri Rangbah ka jylla u N Biren Singh bad kiwei pat ki Myntri jong ka kynhun Cabinet jong u.
U Chief Justice u bathymmai jong ka Manipur High Court u la pynpaw ka jingkmen kaba khraw halor ka jingshah thung kum u Chief Justice jong ka High Court jong ka Manipur bad ong ba un sa jam shakhmat na ka bynta ban shimti ïa ka kam jong u. U la kular ba un sa pynkhuid lut ïa baroh ki mukotduma kiba dang sahteng, ha kaba ki la don bun da kumba 3,335 tylli ha ka High Court jong ka Manipur, da ka jingpyrshang jong u ban trei shitom.
U Myntri Rangbah u la pynpaw ka jingsngewnguh ïa ka sorkar kmie halor ka jingthung ïa u Chief Justice na ka bynta ka Manipur naba ïa kane ka kam la shimti da u In-Charge la slem bha. Kum ban shu pynkynmaw, la ong ba ka Manipur High Court ka la shah pyntreikam hapoh u Acting Chief Justice u M.V. Muralidharan. Ka shuki jong u Chief Justice ka la sah thylli naduh u bnai Rymphang jong u snem 2023.
