Gangtok, Risaw:
Ha kaba ïadei bad ka jingtrei ïa ka kam kum shi bynta ban len lade na ka bynta ka jingim jong ki briew, ka tnat shipai Indian Air Force (IAF) ka dang ïai bteng ha ka jingpyntreikam jong ka ha ka jylla kaba la shah ktah jur na ka jingshlei um ha Sikkim.
Da ka jingpyntreikam ïa ki Helicopter kynthup ïa ka Cheetah, Chinook, Mi-17 1V, bad Mi-17 V5, ka tnat shipai IAF ka la lah leh ïa kumba 262 tylli ki jingleit jurip bniah ha kaba ïadei bad ka jingtrei shitom kumba la bthah da ka sorkar na ka bynta ban pyllait im ïa ki lanot shlei um.
Kane ka jingtrei shitom jong ki ka la ïarap ha ka ban lah ban pyllait im haduh mynta ïa 2,002 ngut ki riewpaidbah na ki thaiñ ba la shah ktah jur na ka jingshlei um, ha kaba la kular ban pyllait im ïa ki bad ban leit buh sha ki jaka kiba shngaiñ.
Haduh ka taïew ba la lah na ka jingïai bteng ban ai jingïarap ha ki bynta jong ka North Sikkim, ki shipai jong ka kynhun Trishakti Corps jong ka tnat Indian Army ki la ïoh ban pyllait im ïa kumba 245 ngut ki briew kiba la sahkut lynti ha ka shnong Rabom namar ka jingshlei um ha Sikkim..
Ka kynhun Trishakti Corps ka la shimti na ka bynta ban ai ka jingïarap sha ki nongshong shnong ki bym ïohlad shuh ban phet ne kynriah jaka na ki thaiñ ba la shahktah na ka jingshlei um.
Ki kynhun shipai jong ka tnat Indian Army ki la ïakhun na ka bynta ban ai ka jingïarap sha ki lanot ha kaba ki la ïaid lyngba ki lynti kiba sohkhruh- shohkhram bad ki bym don lynti ïaid ha kaba ki la hap ban shna lynti na ka bynta ban poi sha ki jaka ban ïoh pyllait im ïa ki nongshong shnong na ki jaka ba la ngat ha ka jingshlei um khamtam ha ka shnong Rabom.
Ki shipai jong ka kynhun Troops of Trishakti Corps ki la pynlong ïa ka jingleit pyllait im ïa ki lanot ha North Sikkim naduh ka 7 tarik, Risaw haduh ka 13 tarik, Risaw.
Da kaba ïaid lyngba ki lum ki wah bad ki khlaw kiba rben, kine ki shipai ki la ïakynduh ïa shibun ki jingeh khamtam haba thut ka suiñ bneng, khlem kynran dien kine ki shipai da kane ka jingïaid lynti jong ki ki la ïoh ban pyllait im ïa kine ki 245 ngut ki briew kiba la sahkut lynti ha ka shnong Rabom.
Kumjuh ki la don palat 132,805 kilogram ki tiar pyndonkam ba man ka sngi ba la phah na ka bynta ki lanot, halor ka jingthmu ban weng ïa ki jingeh jong ki ha kum kane ka por ba ki ïakynduh ïa shibun ki jingeh.
