Aizawl, Risaw:
Ka kynhun jong ki samla pule ka Mizo Zirlai Pawl (MZP) ha ka Sngi Thohdieng ki la pynlong ïa ka jingïakhih kaba heh ban pyrshah ïa ka seng Congress kaba la jied ban pynïakhun ïa ka ‘thei Mizo kaba la ïathoh bad u briew u bym dei na kajuh jaitbynriew na ka bynta ka ilekshon Assembly ka ban long ha ka 7 tarik, Naiwieng ha Mizoram.
Ha ka por ba la pynlong ïa ka jingïakhih, u nongaiktien jong ka seng MZP u Ricky Lalbiakmawia u la ong ba kin sa bteng ïa ka jingïakhih haduh ban da pyntikna ba kane ka kyrtong, ïa kaba la dep ban ïathoh shong kurim ïa u briew u bym dei u riewlum ne na ka kynhun jait bynriew Mizo, kam shahjied shuh na ka bynta ban ïakhun ha kano kano ka ilekshon.
Ka seng MZP, ha u bnai Nohprah jong u snem ba la lah bad ha u Nailar jong une u snem ka la dep ban buh ka jingkyrpad sha baroh ki seng saiñ pyrthei ba kim dei ban jied kyrtong ïa kino kino ki kynthei kiba ïathoh bad ki briew ki bym dei na ka kynhun jait bynriew Mizo ne ki bym dei ki riewlum, ha kaba la btah ban pyntikna ba ym dei ban jied kyrtong ïa ki na ka bynta ban ïakhun ha ka ilekshon Assembly ka ban long ha ka 7 tarik, Naiwieng.
