Imphal, Risaw:
Ha kaba ïadei bad ka jingpyntreikam kaba dang shen, kaba la long ha kine ki khyndiat sngi ba la leit, ki shipai ka tnat Assam Rifles da ka jingjop kaba khraw ki la lah ban pynpulom ïa ka jingthmu shalan tuh ïa ki mar na ki bynta khappud ha ka thaiñ Tuitam Khongkhai, kaba don ha Churachandpur distrik jong ka Manipur, ha kaba ka la ïasam ïa ki bynta jong u pud u sam bad ka Myanmar sha ki bynta ba shaphang Shathie.
Ïa kane ka jingpyntreikam la pynlong hadien ba la ïoh jingtip shaphang ka jingdon jong ka kynhun ki nongkhaïi mar tuh ha kaba la ïoh ban bat ïa saw tylli ki kali ba la kit ïa ki mar ba bun ïa kiba la thmu ban shalan beaiñ ïa ki.
Hadien ba la ïoh ïa ka jingtip kaba bniah, ka kynhun shipai Assam Rifles ka la leit sha katei ka jaka bad ïoh ban kurup ïa ki mar kiba kynthup ïa 1600 kilo u Areca nut, ïa uba la ju tip paidbah kum u kwah Supari, bad kumba 10,231 tylli ki bitor kyiad. Ka jingantad na kane ka jingïoh kurup ïa kine ki mar la ong ba ka la kot sha ka T. 65.31 lak.
Ki shipai ki la kem noh ïa 7 ngut ki briew kiba la donkti ha kaba ïadei bad kane ka kam beaiñ jong ki.
