Guwahati, Risaw:
Ki pulit jong ka Assam ki la ïoh ban kurup ïa u drok uba la kot sha ka T. 20 klur ha ka jaka sangeh liengsuiñ ha Silchar, la ïathuh ki heh pulit ha ka Sngi Thohdieng ha kaba ki la bynrap shuh shuh da kaba ong ba ki la don arngut ki briew kiba dei ban shong ha ka liengsuiñ jong ka Kolkata kiba la shahkem ha kaba ïadei bad ka jingjia. Ïa kine kiba la shahkem la tip kyrteng kum u Joseph Lanluia, 22, uba dei u nongshong shnong jong ka Aizawl, bad u F. Lalmangaizowala, uba la 30 snem ka rta, uba dei u nongshong shnong jong ka thaiñ Champai ha Mizoram.
Kumba la ïathuh da ki pulit, la ong ba la ïoh ban kurup ïa u Methamphetamine uba la don 4 kilo haba la khmih bniah na ki. Ïa u drok la buh ha kawei ka pla.
U Additional Superintendent of Police, jong ka Cachar distrik, u Subrata Sen u la ong:
“Hadien ba la ïoh jingtip halor ka jingdon jong ki briew kiba la rah ïa u drok, ki pulit ki la pynlong ïa ka jingleit khynra ha ka jaka sangeh liengsuiñ da ka jingïarap jong ki shipai ka tnat CISF ha ka por shiteng sngi jong ka sngi Palei ha kaba la ïoh ban kem ïa ki arngut. Kine ki la ap na ka bynta ban kiew ha ka liengsuiñ ka ban leit sha Kolkata.”
U Sen shuh shuh u la ong ba kine ki arngut kiba la shahkem ki la rah ïa u drok na Mizoram bad ki la thmu ban leit sha Kolkata.
Kine baroh arngut ki la shah tohkit ha ki pulit, la ïathuh shuh shuh u heh pulit.
