Guwahati, Risaw:
Ha kaba ïadei bad ka kam leh isynei bad pyrkhat para briew, u MLA jong ka seng BJP ha Assam u Mrinal Saikia u la kner ïa ki kti na ka bynta ban ïarap ïa ki khynnah pule Meitei na Manipur kiba la ïakynduh jingeh na ka jingjia ki kam shah thombor kiba la jia ha ka jylla Manipur.
Kine ki samla pule kim ïohlad shuh ban leit phai ïing namar ba ki kmie ki kpa jong ki ki la sah ha ki jaka sah ba shipor naduh ba la jia ki jingïakynad, ha kaba ki la shem shitom ban ïoh pisa namar ba kim ïohlad shuh ban trei ban ktah.
Ha ka jingpyllait khubor jong u lyngba ka lad phah khubor, u Mrinal Saikia u la pynsaphriang ïa ki dur jong kine ki samla pule ha ka por ba u la ai bam ïa ki.
U MLA u la pynpaw ka jingsngewkhia ïa kine ki samla pule, ha kaba u la thoh, “Nga la ai bam ïa ki khynnah pule Meitei kiba na Manipur, kiba pule ha Jorhat ha ryngkat u pyrsa jong nga. Kine ki khynnah pule kim lah ba leit phai ïing namar ba ki kmie ki kpa jong ki ki shong ki sah ha ki jaka sah ba shipor naduh ka por ba la jia ki jingïakynad ha ka jylla. Kine kim don pisa shuh… nga khot nga wer ïa ki ba kin sah ha ka ïing jong nga na ka bynta ban pyndep ïa ki jingpule jong ki. Mynta kine ki khynnah pule ki la dap da ka jingkmen.”
