Kohima, Risaw:
U Dr Shurhozelie Liezietsu u la hiar shuki noh kum u President jong ka seng Naga People’s Front (NPF). Kane ka jinghiar shuki jong u Liezietsu ka la long hadien 20 snem ba u la bat ïa ka kam kum u President jong ka seng NPF.
U Liezietsu u la hiar shuki noh kum u President jong ka seng NPF ha ka por ba don ka jingïakynduh jong ki dkhot jong ka seng kaba hap ha kajuh ka sngi bad ka jingrakhe ïa ka sngi ba la sdang ïa ka Capital Cultural Hall ha Kohima ha ka sngi Saitjaiñ.
U Apong Pongener, uba dei u President jong ka seng NPF mynta u la shah jied ba un shimti ïa ka kam kum u heh nongïalam jong ka seng.
U Liezietsu u la long u President jong ka seng da kumba 20 snem naduh ba la khie-im biang ka seng naduh ka Naga People’s Convention haduh ka Naga People’s Front. Shuh shuh la ïathuh ba u Liezietsu u la leit ban pynïasoh bad ka seng United Democratic Front ha u snem 1969 bad u la ïai bteng ban shakri ïa ka seng ha kiba bun ki bynta.
U la long ruh u MLA da phra sien bad u la bat ruh ïa kiba bun ki mat treikam kum shi bynta ban kyntiew ïa ki rukom treikam jong ka seng ïa kaba la ïaid lajan 50 snem.
Ha u snem 2003 u la shahjied sha Nagaland Legislative Assembly kum u kyrtong jong ka Naga People’s Front ha ka konstitwensi Northern Angami-I (ST).
Hadien ba u la shahjied, u la shah thung kum u Myntri jong ka tnat ki kam pynroi ha ki thaiñ sor.
Ha ka 22 tarik, Rymphang 2017 u la bamsmai kum u Myntri Rangbah uba 17 jong ka Nagaland.
U la bat ïa ka konstitwensi jong u ha ka ilekshon jong u snem 2008 bad naduh kane ka por u la shah thung kum u Myntri uba dei khmih ïa ka tnat ki kam pynroi ïa ki thaiñ sor na ka bynta ka sien kaba ar ha kaba u la dei ban khmih ruh ïa ka Higher and Technical Education.
