Itanagar, Risaw:
Uwei u dkhot jong ka kynhun lehnoh National Socialist Council of Nagaland (NSCN K-YA) u la leit ban pyndem wait hakhmat ki pulit jong ka Tirap ha Arunachal Pradesh ha ka 22 tarik, Risaw.
Ïa une u dkhot jong kane ka kynhun la tip kyrteng kum u Lieutenant Wanghong Nokpa na ka kynhun lehnoh NSCN (K-YA). Une u la leit ban pyndem ïalade hakhmat u OC jong ka jaka treikam ki pulit ka Lazu bad hakhmat u SI jong ka PS Lazu u L Kimsing bad ka kynhun 6th AR.
Nalor kata, la ong ruh ba une u dkhot jong ka kynhun lehnoh u la leit ban pyndem ïalade ha ryngkat ka pistol 9 mm bad ki kuli kumba 3 song. Hadien kame, la ïalam ïa u hakhmat u Deputy Commissioner, ha Tirap da u District Police bad ka kynhun 6th Assam Rifles na ka bynta ban ïoh ïa ka syrnot jong ka jingleit pyndem jong u.
U Wanghong Nokpa ha ka jingshah tohkit jong u u la phla ba ha u snem 1999 haba u la shong ha ka klas 6 ha Barap Middle School, ma u ha ryngkat 18 ngut ki khynnah ki la shah ïalam da ka bor ha u Capt. Kewang Diotsa jong ka kynhun NSCN(K) na ka bynta ban pynrung jubor ïa ki ha ka kynhun pyntriem.
Ki la hap ban pyndep ïa ka jingshah hikai pyntbit kaba 3 bnai bad pynïasoh kum u SS Private Rank hadien ka jingshah hikai pyntbit.
U la ïakynduh ïa shibun ki jingeh ha kaba ïadei bad ka met ne bad ki jingmut jingpyrkhat ha ka por ba u la don ha katei ka jaka.
U la long u lanot uba la shah pynkordit ha ki jingmut jingpyrkhat jong u da kiwei pat ki lehnoh bad um ju ïoh jingsiew ha ka jaka treikam jong u kumta hadien ba um lah shah shuh ïa kine baroh u la phet na ka jaka treikam jong ka kynhun ka CHQ, kaba don ha Lahong lyngba ka shnong Ngaimong jong ka Myanmar bad na kane ka jaka u la leit beit beit sha ka jaka treikam jong ki pulit ka Lazu na ka bynta ban leit pyndem noh ïalade bad ban phai sha ïing sha sem.
U la shah pyndonkam bakla ha ki heh nongïalam jong ka kynhun pyntriem bad u la kyntu ïa ki samla ba ki dei ban kiar katba lah ha ka ban leit ban pynïasoh bad kine ki kynhun.
