Guwahati, Risaw:
Ka ïingsah jong u President jong ka seng All BTC Minority Students’ Union (ABMSU) u Taison Hussain kaba don ha Tamulpur, Assam ka la shah pynjulor bad ki kmie ki kpa jong u ki la shah thombor ha ki runar ki bym shym la lah ban ithuh ha ka miet jong ka sngi U Blei.
U nongïalam jong kane ka kynhun seng jong ki khynnah pule, u la ong ba u la don ha Bijni, ha ka por ba ka ïing jong u ka la shah thombor.
U Hussain u la ong ba u la don ha Bijni na ka bynta ka prokram bad um nang ban batai balei ba ka ïing jong u ka la shah pynjulor.
U la ong ba ka la don ka jingïakajia kaba malu-mala kaba la jia hajan ka ïing jong u ha Tamulpur hapdeng katto katne ngut ki nongshong shnong.
“Ha kaba ïadei bad ka jingjia, kham hadien ki samla kiba la don bynta ha katei ka jingïakynad ki la rung ha ka ïing jong nga bad pynjulor ïa ka. Ki la ktah kti ruh ïa ki kmie ki kpa jong nga”, u la ong.
U Taison u la bynrap shuh shuh da kaba ong ba kine ki nongthombor ki la pyrta ruh da ki kyntien niam kum ka “Jai Shree Ram” ha ka por ba ki la thombor ïa ka ïing u.
U la ong ba um shym la donkti ei ei ha kaba ïadei bad ka jingjia, ki nongthombor khlem daw ki la rung hapoh ka ïingsah jong u kaba don hajan ka surok bah bad pynjulor ïa ka.
U la bynrap shuh shuh da kaba ong ba ka shlem treikam jong ka ABMSU kaba don hajan ka ïingsah jong u ruh ka la shah pynjulor.
U la buh ka jingkyrpad ïa u Myntri Rangbah jong ka Assam u Himanta Biswa Sarma bad ïa u DGP GP Singh ba kin shim ïa ka sienjam na ka bynta ban leh ei ei ha kaba ïadei bad kane ka jingjia.
U Taison shuh shuh u la buh jingkylli ba balei kine ki runar ki la thombor ïa ka ïingsah jong u da kaba pyndonkam da ki kyntien niam ha ryngkat ka jingdon jong ki pulit.
Nalor kane, u Taison u la bynrap shuh shuh da kaba ong ba kine ki nongthombor ki la byrngem ruh ban pynïap ïa u bad ïa ki bahaïing jong u.
