Guwahati, Risaw:
U Myntri Rangbah jong ka Manipur u N Biren Singh u la ong ba ïa ka Internet shen yn sa pyntreikam noh ha ka jylla.
Kum shi bynta ban ai jubab halor ka jingkylli kaba la wan na ki lad pathai khubor ha kaba ïadei bad ka jingdawa ba la dei ban pyntreikam noh ïa ka Internet hapoh ka jylla, u Myntri Rangbah u la ong, “Ïa ka Internet yn sa sdang pyntreikam noh shen.”
U Myntri Rangbah jong ka Manipur u la kren ïa kine ki kyntien wat lada ïa ka jingkhang ïa ka Internet la pynjlan sha ka 26 tarik, Risaw.
Ka sorkar Manipur ha ka sngi Saitjaiñ ka la pynbna ban nang pynjlan shuh shuh ha ka ban khang ïa ka jingtreikam jong ka Internet ha ka jylla sa kumba san sngi namar ka jingmih biang jong ki jingïakynad ha ki katto katne tylli ki jaka.
Ki pulit jong ka jylla ki la pynmih ïa ka hukum ba la dei ban nang pynjlan shwa ha ka ban khang ban pyntreikam ïa ka Internet haduh ka 26 tarik, Risaw, khnang ban khanglad ïa ka jingpur bad ka jingnang jur jong ki jingïakynad.
