Gangtok, Risaw:
Kum shi bynta ban bteng ka jingai jingïarap ïa ki lanot shlei um ha Sikkim, ki shipai ki la ïai bteng ban ai ka jingshakri kaba kyrpang na ka bynta ban ïarap bad ban pynsuk ïa ki lanot ha baroh ki liang. Kumba ki la kular hashwa, ki shipai ki la bteng ban ai ka jingshakri sha ki lanot kiba la shah ktah jur na ka jingshlei um.
Kane ka jingbteng jong ki ha kaba ïadei bad ki jingai jingïarap sha ki lanot ka kynthup ruh ha ka ban pynbiang ha ka liang ka leit ka wan khamtam hadien ba kiba bun ki surok ki la shah pynjulor. Ka kynhun Trishakti Corps jong ki shipai ka tnat Indian Army ha ryngkat ki shipai ka tnat Border Roads Organisation (BRO) ha ryngkat ka jingïarap jong ki heh sorkar bad ki nongshong shnong ki la shim ka sienjam na ka bynta ban pynïasoh biang ïa ka North Sikkim bad kiwei pat ki bynta jong ka jylla.
Haba ka kynhun BRO ka la pyrshang ban wanrah biang ïa ka surok Mangan-Tung-Chungthang, ki shipai jong ka kynhun Trishakti Corps ki la trei shitom na ka bynta ban plie ïa ka surok Mangan-Sanklang-Theng-Chungthang. Ha kaba ïadei bad ka jingthmu jong ki la donkam ban shna ïa ar tylli ki jingkieng ki ban ïaid nalor ka wah Teesta River ha ka lad Mangan-Sanklang.
Da ka jingtrei shitom kaba 24 kynta, ïa ka jingkieng kaba nyngkong la lah ban pyndep ha ka sngi U Blei, ka 22 tarik, Risaw. Kum ban pynsuk shuh shuh ïa ki briew, la shna ïa ki jingkieng ïaid kjat, ki lynti ban pynjan ïa ka jingleit jingleit ha Chungthang bad ha lad Sanklang-Mangan.
Kine ki lynti ki la ïarap shibun na ka bynta ki briew kiba leit jingleit ha kine ki thaiñ bad kumjuh ban ïarap ïa ki shipai ha ka ban pynpoi ïa ki mar bad ki tiar sha ki lanot shlei um. Namar ka jingshah pynjulor palat jong ka surok bah Mangan-Tung-Chungthang, mynta la sdang ban shna da kawei pat ka surok kaba thymmai na ka shnong Naga kaba long hashwa ka jingkieng kaba la shah pynjulor kaba don ha Toong ha kaba kane kan sa poi sha ka jingkieng ba dang shna thymmai khlem da shim ïa ka por. Ïa ka jingkieng kaba ar la antad ba yn sa lah ban pyndep ha ka 27 tarik, Risaw.
