Guwahati, Risaw:
U heh jong ka AIUDF u Badruddin Ajmal u la ong ba ki Muslim ha Assam ki la dei ban phai khmat shwa ha kaba ïadei bad ka jingnang jingstad ban ïa ki kam beaiñ.
Ha ka jingïakren bad ki nongthoh khubor, u Ajmal u la ong ba katba u dang shah kynthoh ha kaba ïadei bad ki jingkren jong u, u la ïeng ha la kajong ka nongrim ban ong ba kiba bun ki riewpynkheiñ aiñ ha Assam ki dei kiba na ka kynhun jong ki Muslim.
U la ong ba ka jingphai khmat ka la dei ba long beit ha kaba ïadei bad ka jingnang jingstad, kiba bun ki la iehnoh ïa ki jingpule bad phai khmat ban leh ïa ki kam beaiñ ha kaba kiba bun na ki nongïalam jong ka kynhun ki Muslim kumba la ïohi kim ju wanrah ïa kane ka mat na ka bynta ban ïakren sani bha.
“Nga la shah kynthoh jur halor kane, hynrei kiwei pat ki nongïalam jong ka kynhun ki Muslim ha ka jylla kim kwah ban wanrah ka jingkylla bad kumba ka paw kim shym trei na ka bynta ka jingbha bad ka jingmyntoi jong ki kynhun Muslim”, u la bynrap.
Kum shi bynta ban pynphai ktien halor ki jingshah kynthoh jong u ha ki nongïalam jong ka seng Congress, u Ajmal u la ong, “Nga pyni bor pyrshah ïa uno uno u nongïalam jong ka seng Congress ha ka ban pyni markhmat ba la don tang kawei ka skul bad tang kawei ka kolej ba ki la shna. Nga dap da ka jingsngew sarong ban ong ba ngi la dep ban shna ïa kiba bun tylli ki skul bad ki kolej ha ka jylla. Mynta ngi la sdang ban shna sa ïa ka Medical Institute na ka bynta ki khynnah pule hynrei ka seng Congress kan ym lah ba kam shalade.”
U Ajmal u la bynrap shuh shuh da kaba ong ba ki briew khamtam ki nongïalam Muslim ki bym shym la leh ei ei na ka bynta ki Muslim ne ka kynhun jong ki ha Assam ki kynthoh pyrshah ïa u namar ba u kren ïa ka jingshisha.
Kum ban shu kdew, la ong ba u heh nongïalam jong ka AIUDF hashwa u la ong ba ki Muslim ki la leh ïa kiba bun ki kam beaiñ ha Assam bad ha kaba ïadei bad kane ka la dei ban don ka jingthaw thymmai ne ka jingpynkylla.
