Aizawl, Risaw:
Ka kynhun nongïalam bahakhliehduh jong ka seng BJP ka la pdiang ïa ki kyrteng jong ki 21 ngut ki kyrtong ki ban sa ïakhun ha ka ilekshon Assembly ha Mizoram, ha kaba ïa ka ilekshon la thmu ban pynlong ha ka 7 tarik, Naiwieng.
Ha kaba ïadei bad ka jingphah jingthoh, ka seng ka la dep ban pynbna ïa ka kyrteng jong u Bhavna Bohra kum u kyrtong jong ka seng na ka bynta ban ïakhun na ka Pandariya Assembly konstitwensi ha Chhattisgarh, ha kaba ïa ka ilekshon la thum ban pynlong ha ki ar bynta kata ha ka 7 tarik, Naiwieng bad ka 17 tarik, Naiwieng.
Da kane, ka seng BJP mynta ka la dep ban pynbna ïa ki kyrteng jong ki kyrtong na ka bynta ki 86 tylli ki konstitwensi na ka bynta ban ïakhun ïa ka ilekshon ban jied ïa ki 90 ngut ki dkhot jong ka ïingdorbar ha Chhattisgarh.
Ha kaba ïadei bad ka thup kyrteng jong ki kyrtong kaba nyngkong jong ka seng ban ïakhun na ka bynta ka ilekshon Assembly ha Mizoram, u R Lalbiaktluangi un sa ïakhun na Lunglei West konstitwensi, u Shanti Bikash Chakma na Thorang, u Malsawmtluanga na Hachhek bad u Vanlalhmuaka na Dampa konstitwensi.
Ki la don baroh kumba 12 tylli ki kyrteng ha kane ka thup kyrteng kaba nyngkong.
Ha ka thup kyrteng kaba ar ki la don kumba 9 ngut ki kyrtong ïa kaba la pyllait dang shen, ka seng BJP ka la jied kyrtong da ka Judy Zohmingliani na ka bynta ka Tuivawl Assembly konstitwensi, ka F Lalremsangi na ka bynta ka Aizwal South-I konstitwensi bad ka K Vanlalruati na ka bynta ka Serchhip konstitwensi napdeng kiwei pat.
Kumba la kheiñ ki la don baroh kumba 40 tylli ki konstitwensi ha ka Mizoram Assembly.
