Aizawl, Risaw:
Ka seng Aam Aadmi Party (AAP) ka la dep ban pynbna ïa ki kyrteng jong ki kyrtong ki ban ïakhun ha saw tylli ki konstitwensi ha Mizoram, kynthup ïa kito kiba ka seng Congress ka la dep ban pynïakhun ïa u President ka seng ha ka jylla bad u Vice-President.
Ha ka jingai jingkren ha ki nongthoh khubor, u nongkhmih bad nongpynïaid jong ka seng AAP ha ka jylla Shatei-lam-Mihngi u Rajesh Sharma u la ong ba ka seng ka lah ban pynbna shuh ïa ki kyrteng jong ki kyrtong kiba dang sah.
Ka seng AAP kan sa trei na ka bynta baroh ha ka liang ka roi ka par jong ka Mizoram, bad ban pynlong ïa ka ka jylla kaba lait na ki kam bamsap, u la ong. u President jong ka seng AAP ha ka jylla u Andrew Lalremkima un sa ïakhun ïa ka ilekshon na Aizawl North-III konstitwensi pyrshah ïa u C Lalmuanpuia jong ka seng MNF, ïa u Vice- President jong ka seng Congress ha ka jylla u Lal Thanzara bad u Working Chairman jong ka seng ZPM u K Sapdanga.
U Secretary jong ka seng AAP ha ka jylla u Joseph Biakthianghlima u la shahjied ban ïakhun na Aizawl West-III konstitwensi pyrshah ïa u President jong ka seng Congress u Lalsawta, u MLA jong ka seng ZPM u VL Zaithanzama bad u kyrtong jong ka seng MNF u K Sawmvela.
Ka seng AAP ka la pynbna ïa ka kyrteng jong u Vanlalmawia Vanchhawng na Aizawl West-I konstitwensi bad u Lalngaihawma Pachuau ha Aizawl South-I konstitwensi.
Ka seng MNF, ZPM bad ka seng Congress ki la pynïakhun ïa ki kyrtong ha baroh 40 tylli ki konstitwensi, katba ka seng BJP kan sa ïakhun ha ki 23 tylli ki konstitwensi. Ka kynhun Zoramthar ne ka Lalpa Chhiahlawh Intelkhawm (Association of God’s Servants) ïa kaba la lamkhmat da u Pastor uba la shongthait u Zaichhawna Hlawndo kan sa ïakhun ha ki 18 tylli ki konstitwensi.
Ka jingpynlong ïa ka ilekshon ha ka jylla kan sa long ha ka 7 tarik, Naiwieng, bad kumba la pynbeit ba ka jingñiew ïa ki vote kan sa long ha ka 3 tarik, Nohprah.
