Kohima, Risaw:
U Symbud Myntri Rangbah jong ka Nagaland u TR Zeliang, u la wer ïa ki briew jong ka Zeliangrong kiba shong basah ha Assam, Manipur, bad Nagaland ba ki dei ban ïatylli lang ha ka ban ai kawei ka sur.
U la ong ba kane kan sa ïarap ban wanrah ka jingïatylli jong ki kynhun jong ki ha Nagaland bad Manipur.
U Zeliang u la kren ïa kane ha ka Zeliangrong Meet kaba la long ha New Delhi halor ka phang “Zeliangrong Solidarity: Strengthening Unity, Culture and Progress”.
U la pynpaw ba u don ka jingkyrmen ba kane ka jingïakynduhlang kan long kum ka jingsdang na ka bynta ka jingwanrah ïa ka jingïatylli jong ki briew.
U Zeliang u la pynkynmaw ruh ba kumno ki Zeliangrong ki la shah pynïakhlad ha ki phareng lyngba ka jingbuh ïa ki pud ki sam bad kumba ka la paw na ka jingpha jong u Haipou Jadonang bad ka Rani Gaidinliu ïa la kajong ka jingim na ka bynta ka hok bad ka jinglaitluid jong ki Zeliangrong.
U la ong ba lai ngut ki shipara kiba kynthup ïa u Zeme, Liangmai, bad u Rongmei, ki la wan na kajuh ka longïing hynrei ki la shah pynïajngai jubor.
Kine ki la imsuk-imsaiñ haba ki don baroh shipara bad ha ka por ka bym poi pyrkhat ki la shah pynïakhlad noh iwei na iwei pat ha ki shipai phareng bad knieh jubor ïa ka jaka jong ki.
Ha katei ka por ki shipai phareng ki la mih noh, ki Zeliangrong ki la shah phiah sha ki lai tylli ki bynta jong ki jylla kiba don ha ki bynta khappud, u la bynrap.
Namar kata, u Zeliang u la kyntu ïa ki Zeliangrong ba kin ïasnoh kti lang bad ban ïatylli ha man ki bynta khnang ba yn dup lah ban pynsah ïa ka riti dustur bad ban treikam kum kawei ka jait bynriew.
U la buh ka jingkyrpad na ka bynta ka seng Zeliangrong Students’ Union Delhi (ZSUD) bad ka Zeliangrong Welfare Association Delhi (ZWAD) ba kin buh kawei ka kynhun ba la tip kum ka “Grievance Cell” na ka bynta ki nong Zeliangrong, khamtam ki samla kiba pule ha Delhi.
U Zeliang u la ong ba da ka jingdon jong ka “Grievance Cell” kan sa ïarap ïa ki hynmen para jong ka Zeliangrong ba kin ïoh ïa ki jingbishar bahok bad ban ïakhun pyrshah halor ki jingeh ba ki ïakynduh ha kiba bun ki liang kynthup ha kaba ïadei bad ki jingshah leh donbor bad kumjuh ki jingshah thombor.
