Shillong, Naiweng 01
Ka Seng Kur Wahlang (SKW) ka la pynlong ïa ka Dorbar Bah kaba XV jong ka ha ka 24 tarik Risaw, 2023 ha Tirot Sing Memorial Hall, Pyndengumïong, Mairang ha kaba ki Kur kiba najan bad najngai ki la ïawan ban ïashim bynta lang ha katei ka Dorbar.
Kum shi bynta ha ka ban pynshlur ïa ki khun samla ka Kur, ka Dorbar Kur ka la
pynkup burom ïa u Rangbah Donald Phillips Wahlang, IAS kum uwei na ki Rangbah jong ka Kur uba lah ban kot sha ka thong ban bat ïa ka kyrdan Chief Secretary jong ka Jylla.
Ha kajuh ka por, la pynkup burom ruh ïa u Rangbah Gabriel Wahlang, MLA & MDC ha ka jinglah jong u ban long kum u MLA & MDC jong ka Nongstoiñ konstitwensi.
Ha kane ka sngi, la pynkup burom ruh ïa u Rangbah River Onell Wahlang. Rtd. IFS uba la shongthait kum u High Commissioner lane u Ambassador jong ka Ri India.
Ka Kur ka la ïoh ruh ka kaiphod lyngkot halor ka jingtreikam na ki nongmihkhmat jong ki Jylli (Circle) kiba la ïa poi sha kane ka Dorbar.
Nalor kane, la ïoh ruh ïa ka jingrwai kyrpang na ki khun samla jong ka Mairang Jylli (Circle) bad ruh na ka Seng Samla ka Kur kaba la pynshoh biej ïa ka para Kur kiba wan Dorbar.
Ka jingpoi jong ki Kur sha ka Dorbar ka long kaba shitrhem ha kaba ki Kur najan bad najngai ki la ïa poi ryntih. Ka la don ruh ka jingai khusnam ïa ki khun samla ka Kur kiba wan shakhmat ha ki jingïalehkai Sport bad ki samla na ka Kur kiba la ‘pass’ bha ha ki eksamin jong ki.
Ka Seng Kur Wahlang ka don ka jingkitkhlieh na ka bynta ki para, ki pyrsa, samla kiba long ka lawei jong ka Kur bad ka Jaidbynriew. Kumta ka khot bad pynshlur ïa ki samla ba kin kiar horkit-hordang na ki jingsniew ka juk mynta, bad ba kin ïa beh shaphrang ban long ki nongjop ha ka pule-dangle, bad kiwei-kiwei ki lad ki lynti ban pynkhraw ïalade, ïa ka Kur bad ïa ka Jaidbynriew.
Kane ka long katkum ka kyrwoh na u General Secretary ka Seng Kur Wahlang, Rangbah R. Willie Wahlang.
