New Delhi, Naiwieng:
U Myntri jong ka tnat Mariang ha Delhi u Gopal Rai u la khot jingïalang ïa baroh ki Myntri na ka bynta ban ïakren sani bha ha kaba ïadei bad ki jingeh kiba la mih na ka daw jong ka jingjaboh jong ka lyer ha ka nongbah da palat ar taïew mynta.
Kane ka jingïalang jong ki Myntri ba la khot pynlong da u Rai ka la long ha Delhi Secretariat, la ïathuh ki heh ba dei khmih. Kumba la khmih bniah, la ong ba ka jinglong jong ka lyer ha ka nongbah Delhi ka la nang jaboh katba nang mih ki sngi, ha kaba ka la jaboh bha kumba la khmih bniah hynnin ka step.
Ka Air Quality Index (AQI) ha ka nongbah ka la long da 420 haduh ka por 8 baje hynnin ka step, haba ïanujor bad ka AQI kaba la long ha ka sngi Balang da 426 ha ka por 4 baje janmiet. Ka AQI Map ba la pynkhreh da ka Central Pollution Control Board ka la pyni shai ba ki la don ki phngit rong saw kiba rit kiba la saphriang ha kylleng ki bynta jong ka Indo-Gangetic Plains.
Ka AQI ha ki bynta ba marjan kiba kynthup ïa ka Ghaziabad ka la long (369), Gurugram (396), Noida (394), Greater Noida (450), bad Faridabad (413) bad kine ki la shah ñiew ba ki la don ïa ka lyer kaba jaboh haduh katta katta. Kumba la ïathuh ki heh jong ka India Meteorological Department, ki la ong ba ka jingkylla ha kaba ïadei bad ka jingbeh jong ka lyer na ka bynta ba shaphang Shatei-Sepngi sha Shathie-Mihngi namar ka jingwan beh jong ka lyer kaba thymmai na ka bynta ba shaphang Sepngi ka la leit sha ki bynta ba shaphang Shatei-Sepngi jong ka ri ha kaba kane kan sa ïarap ban pynkhuid bad pynduna na ka jingdon jong ka tdem kaba la kiew na ka jingthang bun jong ki nongrep.
