Shillong, Nohprah 19
Ka Meghalaya High Court ha ka Sngi Ba-Ar ka la ai hukum ïa ka sorkar jylla ba kan weng mardor ïa u Superintendent of Police (SP) ka East Jaiñtia Hills, u Jagpal Singh Dhanoa, IPS halor ka nongrim ba u khlem lah ban shim ïa ki sienjam ban teh lakam ïa ki kam be-aiñ kiba ïadei bad u dewïong.
“Kumba la ai jingtip, u SP u la don ha East Jaiñtia Hills naduh u snem 2021, bad namarkata, u la dei ban tip kham bha ïa kaei kaba jia ha ka distrik. Ka kaiphod kaba 19 jong u Justice BP Katakey (Retired) ka pynpaw ba u SP lehse um lah ban teh lakam ïa ki kam be-aiñ,” la ong ka High Court ha ka hukum.
Namar ka jingpulom jong u SP kumba la paw na ka kaiphod kaba 19 jong u Justice Katakey, ka High Court ka la bthah ba dei ban weng noh mardor ïa u bad ban wanrah da uwei pat u ophisar uba kham biang ha ka rukom treikam. La bthah ïa ka tnat Korbar Jylla (Home Department) bad ïa u heh duh ki pulit (Director General of Police) ban shim mardor ïa ki sienjam halor kane.
Ha kajuh ka por, ka High Court ka la maham ïa u Deputy Commissioner ka East Jaiñtia Hills, u Abhilash Baranwal, IAS, bad la khmih lynti ba un shim ïa baroh ki sienjam khnang ban pynthikna ba kan don ka jingburom ïa ki hukum ba la ai da ka ïingbishar bad kan don ruh ka jingïaid beit ha ki kam ki jam.
