Shillong, Jymmang 20
Ka North Eastern Hill University Teachers’ Association (NEHUTA) ha ka Sngi Ba-ar ka la kyrpad ïa ka Vice-Chancellor (Acting), Prof. S.M. Sungoh ban ïaid shakhmat bad ka Academic Council (AC) kaba la pynbeit ban long ha ka 21 tarik mynta u bnai.
“Ka NEHUTA ka kyrpad ïa ka VC (Acting) Prof. S. M. Sungoh ba ka jingïalang (ba la pynsangeh shuwa) ba 113 jong ka AC bad kaba la pynbeit ban long ha ka 21 tarik Jymmang, 2025 ha ka por 10:30 baje mynstep ha Multiuse Convention Hall ka dei ban ïaid shakhmat namarba ka la ïoh ïa ka bor ba pura ban pyndep ïa ki kamram kum ka VC katkum ka NEHU Statute (2(A)(5)(i),” ong ki nongïalam ka NEHUTA ha ka kyrwoh khubor.
Ki la ong ruh ba ki don ki jingpynbna na ka tnad pule-puthi ka Sorkar Pdeng na ka por sha ka por ha ka jingbym don u VC ha Campus uba don hapdeng ka shuti kaba khlem jingbit (bad kaba slem) bad u bym pat rung sha ophis ha Headquarter jong ka NEHU, Shillong ban pynïasoh bad pyndep la ki kamram kumba la bthah katkum ka Statute 2(A)(2).
“Ka long shisha kaba sngew samrkhie bad pynjah burom ba u Prof. P. S. Shukla, uba long u nongpynkheiñ ba ha khliehduh ïa ka NEHU Act, ki ‘Statute’ bad ‘Ordinance’, ki kyndon UGC 2018, UGC – Model Cadre Recruitment Rules na bynta ki nongtrei bym dei ki nonghikai, ka Sorkar India, ki kyndon CCS, bad kiwei-kiwei kiba ka NEHU ka ju tip, u buh jingkylli ïa ka bor katkum ka aiñ jong ka Prof. Sungoh ban khot ïa ka jingïalang jong ka AC,” ki la ong.
Ki la ong ruh ba ka Prof. Sungoh ka don ha ka jaka kaba biang tam ban pyndep la ka kamram kum ka VC katkum ka NEHU Act bad ‘Statute’ bad ka NEHUTA ka ïeng skhem ha syndah (jong ka) ban pynlah ïa ka ban ïaid shakhmat bad ki kam ki jam khlem jingtieng ne jingshah liang.
“U Prof. Shukla u thrang dik-dik ban pynthut bad pynjot ïa ka NEHU ïa kaba ngi long, bad ngin ïai ïakhun tyngeh beit ïa kane. Ka NEHU ka long kaba bit ba biang ban khmih ïa ki jingeh jong ki kolej, samla pule bad ki kmie ki kpa khlem u Prof. Shukla,” ki la ong.
Ha kajuh ka por ki nongïalam ka NEHUTA ki la kubur ba ka jingbym don jong u Prof. Shukla la palat hynriew bnai na ki kam ha NEHU-Shillong ka la long pynban ka jingkyrkhu kaba buhrieh ha kaba baroh ki jingtei pynroi, ki bui treikam, bad kiwei-kiwei kiba la pynsahkut da u Prof. Shukla haduh 3 snem shiteng, ki la ïaid shakhmat bad la lah ban pynkhuid ïa ki.
“U dei ban ïai bteng ha ka ban sngewbha ïa ka shuti ba khlem jingbit jong u ha ryngkat ka tulop katba u lah na Guwahati, Delhi, Gonda Uttarakhand, Lucknow, ne ha duriaw, haw-haw, bad kumta ter-ter bad ai ba yn pynïaid ïa ka NEHU da kito kiba sngewkhia na bynta jong ka katkum ka ‘Act’ bad ‘Statute’ jong ka NEHU,” ki la ong.
Na ka liang ka NEHUTA ka la pynskhem ruh ba kam ju pdiang satia ïa ki jingthung kam be-aiñ ïa ki Pro Vice-Chancellor da kaba pynshong nongrim katkum ki jingpynbna ba la pynmih da u Assistant Registrar, Planning, ha ka 13/11/2024 bad hadien pat da u Omkar Singh, ha ka 14/11/2024, tang namarba u VC, uba la pep na HQ, jong ka NEHU, Shillong – um shym la bud ïa ki rukom treikam kiba biang kumba la kdew ha ka Statute 3 jong ka NEHU halor ka jingthung ïa ki Pro-VC.
Shuh shuh, ki la bynrap ba ïa kane ka shithi la pynmih da u Omkar Singh, uba don hapdeng ka shuti naduh ka 3/11/2024 bad u bym pat pynïasoh sha HQ jong ka NEHU, Shillong naduh katei ka por mynta la palat hynriew bnai – kaba kane hi ka long kaba be-aiñ haduh katta-katta.
“Namarkata, la kheiñ ïa ki jingleh jong ki kum ki ‘jingleh shaba palat pud’,” ong ki nongïalam.
Nalor kata, ki la ong ba ïa ki kam jong u Prof. Shukla & Omkar Singh ha ka por ba ki dang don ha ka shuti bad bym don ha ka HQ ha NEHU, Shillong la pyndam arsien da u Vice Chancellor (Acting).
“Ka NEHUTA ka kyrmen skhem ba kan ïoh ïa ka jingïakren bad jingïamir jingmut kaba seisoh ha ka jingïalang AC ha ka 21 tarik u Jymmang, 2025,” ki la ong.
