Shillong, Nohprah 22
U President jong ka Hynñiewtrep National Youth Front (HNYF), East Khasi Hills District, u Bah Bless Dkhar u la ïoh jamin noh na ka ïingkashari ha ka 19 tarik mynta u Nohprah hadien ba shah kem ha ka 30 tarik u Risaw 2023 halor ka jingshah kynnoh ba u la donkti ban dawa pisa kumba T.1500 na ki trok kit mar kiba kit palat pud kiba ïaid lyngba ka jingkieng Damsite.
Na ka liang U Nongsaiñ Hima haba ïoh ban ïakren bad u Bah Fernando Shangpliang uba dei u muktiar jong u Bah Bless Dkhar ha ka Sngi Palei, u la ong ba ïa u Bah Bless la ujor mukotduma hapoh ka thanat Mawlai bad na ka liang jong u kum u muktiar u la lah ban sei bad pyllait ïa u Bah Bless napoh patok hadien 1 bnai 19 sngi.
“Ha ka 20 tarik u bnai Nohprah la ïoh ban pyllait ïa u napoh patok hadien ba ki nongbah jamin ki lah wan arngut bad ki la lah ban sei ïa u napoh patok”, la ong u Bah Shangpliang.
Haba kylli ha kano ka nongrim ba ka ïingkashari ka la ai jamin ïa u Bah Bless, utei u Muktiar u la ong ba watla ka long kaba eh ïa ka ïingkashari ban ai jamin ïa u Bah Bless hynrei kum u muktiar ba la bynshet ïa ka kam ha u ban leh, u la trei shitom bad ka jingai jamin jong ka ïingkashari ka dei halor ka nongrim katkum ka Article kaba 21 jong ka riti synshar ka ri bad u la ong ba hadien ka jingïasaid bad ka ïingkashari ka la ibit ban ai jamin noh ïa u Bah Bless.
“Kita ki dei kiei-kiei ba ka ïingkashari ka la shim namar ba u briew hi hadien ba ngi la ïasaid bad ka ïingkashari ruh, ka sngewthuh ba u briew u don ïa ka hok ba un lait bad ka la ibit ban ai jamin ïa u namar kane ka kyndon ka long ka kyndon kaba ïar bha”, la ong u Bah Shangpliang.
Haba kylli halor ka jingong jong kiba bun ba kane ka jingshah kem jong u Bah Bless ka long kaba eh ba un lait napoh patok bad kan sa shimpor, u Bah Shangpliang u la ong ba kane ka jingïoh jamin jong u Bah Bless ka dei ha ka sien kaba lai ba un sa lait bad kum u muktiar u la sngewthuh shai ba ym don eiei shuh bad ka ïingkashari ka la peit lut nadong-shadong, kumta ka la ibit ban pyllait jamin noh ïa u Bah Bless.
“Nga la sngewthuh shai ba ym don eiei shuh bad na ka liang jong ka ïingkashari hadien ba nga lah ai ïa ki nongrim katkum ka hok ba nga la ïasaid na ka bynta jong u, ka dei halor kata ka nongrim ba ka ïingkashari kan sa pyllait noh ïa u watla na ka liang jong ki pulit kim pat dep ïa ki jingtohkit hynrei na ka liang jong ka ïingkashari ka la ibit bad ka jingrai jong ka ïingkashari ka dei lyngba ka jingstad jong ka hi”, la ong u Bah Shangpliang.
Haba kylli la hato u Bah Bless u la ju shah pynngat ha kaba ïadei bad kiwei kiwei pat ki mukotduma, u Bah Shangpliang u la ong ba u Bah Bless u la ju shah pynngat teng ha ka mukotduma kaba la ujor ha thanat jong ka Pynursla ha u snem 2021. Na ka liang ka tnad pulit watla ka la khyllie biang ïa kane ka mukotduma pyrshah ïa u Bah Bless hynrei kane ka mukotduma kaba rim ka dei kaba dang rit bad kane haduh mynta kam pat ïaid satia bad u kyrmen skhem ba kum u muktiar, u Bah Bless un sa ïoh ïa ka jingjop.
“Na ka liang jong ka ïingkashari haduh mynta ha kaba ïadei bad ka mukotduma kaba la ujor ha Pynursla ym pat lah ban rai bad haduh mynta kam pat ïaid hi bad wat lada ka la ïaid ruh, na ka liang jong nga kum u muktiar, ngan trei shitom ïa kane bad nga ngeit skhem ba na ka liang jong u ruh un sa ïoh ïa ka jingjop”, la ong u Bah Shangpliang.
U Bah Shangpliang u la ong ba ïa u briew yn sa lah ban ong ba u don daw sniew dei hadien ba ka ïingkashari ka la lap bad shem ïa u ba u don dak sniew, bad halor kata ka nongrim, ka ïingkashari kan sa rai pynrem hynrei haduh mynta kam pat don satia kaba kum kata.
“Ïa u briew ngin sa lah ban ong ba u dei u briew uba don ïa ki dak sniew, ka dei hadien ba ka ïingkashari ka lah lap bad shem ba u don dak sniew bad halor kata ka nongrim, ka ïingkashari kan sa rai pynrem ïa u hynrei haduh mynta kam pat don kaba kum kata”, la ong u Bah Shangpliang.
Haba kylli naduh lano bad haduh lano u Bah Bless un hap ban leit hajir shapoh ka ïingkashari, u Bah Shangpliang u la ong na ka liang jong ka tnad pulit kaba tohkit halor kane ka jingshah kem jong u Bah Bless kam pat aiti ïa ka ‘Chargesheet’ bad hadien ka jingaiti ïa ka ‘Chargesheet’, kin hap ban rah shapoh ka ïingkashari bad hadien kata na ka liang jong ka ïingkashari ka lah ban shimpor katto katne bnai eiei, bad ka ïingkashari kan sa buh ïa ka por lano ban pynïaid ïa ka ‘case’ bad dei ha kata ka por ba katkum ki kyndon kiba la pynngat ïa u, u Bah Bless u dei ban wan hajir hapoh ïingkashari.
U Bah Shangpliang u la ong kumba ka ïingkashari ka la ai jamin ïa u, um don eiei shuh bad u briew u la long laitluid tat haduh ba ka ‘case’ kan da ïaid shakhmat, un hap ban leit hajir hapoh ïingkashari. Ka ïingkashari hashwa ba kan ai jamin ïa u, ka la kren shai bad ka la buh da ki kyndon ba u hap ban wan hajir bad lada um wan hajir ruh, u lah ban shah kem biang”, la ong u Bah Shangpliang.
“Ka ïingkashari ka la pyllait ïa u bad ka kyndon ka long beit ba um dei ban pynjah ïa kino-kino ki sakhi ha kaba ïadei bad ka ‘case’ hynrei mynta hi u la long beit u briew uba laitluid”, la ong u Bah Shangpliang.
