Shillong, Jylliew 12
U Deputy Inspector General of Police (DIGP), D.N.R Marak, u la ong ba ka Sonam Raghuvanshi ka la phla ba ka donkti lang ban pynïap ïa u Raja Raghuvanshi uba dei u kurim jong ka hynrei ïa u nongsdang ban plan ïa kane ka kam pat yn dang hap ban tohkit bha shwa, namar ba ïa mynta u Raj Kushwaha bad ka Sonam Raghuvanshi ki ïa kynnoh iwei-ïa-iwei pat.
Haba ïakren bad ki lad pathai khubor ha ka Sngi Palei, ka 12 tarik u Jylliew 2025, u Marak u la ong namar ba kine ar ngut ki ïa kynnoh iwei-ïa-iwei pat, kumta na ka liang ki pulit ïa mynta ki dang pynlong ka jingtohkit marwei-marwei hynrei hadien pat kin sa tohkit lang bad kin sa peit hangta mano ba sdang ban leh ne ban thmu ïa kane ka kam pynïap.
Katkum ka jingïathuh jong lai ngut ba kynnoh donkti ban pynïap ïa u Raja Raghuvanshi, kita u Akash Rajput, u Vishal Singh Johan, bad u Anand Kurmi, ka Sonam ka ïarap lang ban pynhap ïa ka met u Raja Raghuvanshi shapoh riat hadien ba la dep ban pynïap ïa u ha ka 23 tarik u Jymmang 2025.
Haba kylli pat, la ka don ne em ka jingphah pisa na ka liang ka Sonam Raghuvanshi sha kine baroh lai ngut kiba ai-nong ban pynïap ïa u Raja Raghuvanshi bad ruh halor ka jingmih ki khubor ba ka Sonam ka ai-nong T.20 lak ban pynïap ïa u Raja Raghuvanshi, na ka liang u Marak u la ong, ba ïa kane ka jingtohkit mynta ka dang ïaid shakhmat.
Nalor kane, u Marak u la ïathuh hadien ba ki la dep ban pynïap ïa u Raja Raghuvanshi bad bret ïa ka met shapoh riat, ka Sonam Raghuvanshi ka la leit lang bad kine lai ngut da ka scooty shaduh Mawkdok. Nangne pat ka shim taksi ban leit sha Guwahati bad leit phai sha Indore, katba lai ngut kiwei pat ki la ïaid la ka lynti.
U la ïathuh ruh ba ki don sa ar tylli ki scooty ba ki pyndonkam bad ha ka por ba ki leit buh ïa ka scooty ha Sohrarim ki don lang baroh saw ngut, ka Sonam bad lai ngut ki runar ba ai-nong ban pynïap ïa u Raja Raghuvanshi.
Kine ki runar ki la shim wai ar tylli ki Scooty na nongbah Shillong hynrei ïa ka jaka ba ki shim wai pat um pat lah ban ïathuh ïa mynta, ong u Marak.
Shuh shuh, u la ong ba ka jinglap ki pulit ïa ka metïap jong u Raja Raghuvanshi ha ka 2 tarik Jylliew 2025 bad ïa ka wait ha ka sngi kaba bud jong ka 3 tarik, ka la pynlong shuh shuh ïa ki pulit ban suba ba ka Sonam Raghuvanshi ka donkti lang ban pynïap ïa la u lok.
Ki pulit ki la sdang suba ba ka Sonam Raghuvanshi ka lah ban donkti lang ban pynïap ïa la u lok, namar hadien wat haba la buddien ïa ki rynsan Social Media jong ki shikurim, ki pulit kim lap satia ba kin shondur ne ban buh ïa ki dur ki dar jong ki watla ki wan ‘honeymoon’ sha Sohra.
U Marak u la pyntip ruh ba ka daw ba ki pulit ki suba ïa ka Sonam Raghuvanshi halor ka jingshah pynïap u Raja Raghuvanshi ka dei hadien ba ki la lap ba hapoh pla jong ki kaba ki ieh ha Manbha Homestay ha Sohra nalor ki jaiñ don ruh u Mangalsutra lane u jingdeng ryndang ha kaba ïa ki kynthei Hindu haba ki la ïoh lok ki ju deng bad ka don ruh ka sati hapoh kata ka pla.
Kumta, ki pulit ki suba ba ka kynthei aiu kaba la don la u jong u lok ka ban ieh ïa u Mangalsutra khamtam haba ka leit jingleit shabar.
