Agartala, K’lyngkot:
Ka Tripura ka la paw ba ka la wan hakhmat ha kaba ïadei bad ka jingïakhun pyrshah ïa ki nongkhaïi drok naba ki la don kumba 1,052 ngut ki nongkhaïi drok kiba la shahkem ha kaba ïadei bad ki 633 tylli ki jingjia ha u snem 2023, ha kaba ka la paw ba ka la kiew bha ha kaba ïadei bad ki jingpyntreikam ha ki ar snem.
U Myntri Rangbah jong ka jylla u Dr. Manik Saha u la pynbna ba ka sorkar jylla ka la nang khlaiñ ha kaba ïadei bad ka jingïakhun bad nang pynbun ïa ka jingïalap paidbah pyrshah ïa u drok.
Kumba la sakhi, la ong ba kum kine ki jingïalap paidbah ki ai jingmyntoi shibun khamtam ïa ki riewpaidbah ha kaba ki tip kumno ban leh ban ïakhun pyrshah ïa u drok bad ban khanglad ïa kito kiba ju khaïi drok sha kylleng ki jaka.
U Dr. Saha u la ban jur ha kaba ïadei bad ka jinglah jong ki pulit ka Tripura ban ïakhun pyrshah ïa u drok ha palat lai snem ha ka por ba u la kren ha Assembly.
Ha u snem 2021, ka kynhun tohkit, ka la kem ïa ki 501 ngut ki briew ha kaba ïadei bad ki 352 tylli ki jingjia, kurup kumba 41,565 kilo u Ganja, 2.6 lak tylli ki bitor dawai jyrhoh, 14.19 lak ki kuli bad 3,850 gram u Heroin.
Shuh shuh ki la lah ban pynjulor ruh ïa u Cannabis uba la kot sha ka T. 62.20 lak. Ha u snem 2022, ki la don kumba 759 ngut ki briew kiba la shahkem ha ki 562 tylli ki jingjia, ha kaba kane ka la pynlong ïa ka jingïoh kurup ïa 79,377 kilo u Ganja, 1.73 lak bitor ki dawai jyrhoh, 2.2 lak ki dawai kuli bad 7,075 gram u Heroin.
Ha u snem 2023, la don baroh kumba 1052 ngut ki briew kiba la shahkem ha ki 633 tylli ki jingjia ba la dep ban buh jingthoh.
“La ïoh ban kurup ïa 46,631 kilo u Ganja, 308,582 tylli ki bitor dawai jyrhoh, 4.44 lak ki dawai kuli bad 18,844 gram u Heroin. Ha kane ka por, kumba 6,873,935 ki tynrai Cannabis la ïoh ban pynjulor.” U Dr. Saha u la bynrap shuh shuh da kaba ong ba ïa ka Addiction Treatment Facility (ATF) la buh ha De-Addiction Center ha Government Modern Psychiatry Hospital, halor ka jingthmu ban nang pynbha ïa ki jingpyntreikam ha kiwei pat ki distrik jong ka jylla.
