Aizawl, K’lyngkot:
U Myntri ka sorkar kmie uba dei khmih ïa ka tnat Road Transport and Highways, u Nitin Gadkari, u la mang da kumba T. 1313.28 klur na ka bynta ka Twin Tube Uni-directional Aizawl Bypass Tunnel Project. Kane ka jingpynbna ka la long hadien ka jingïalang kaba dang shen hapdeng u Gadkari bad u Myntri Rangbah jong ka Mizoram u Lalduhoma ha New Delhi.
U Lalduhoma u la pynshai bha ha ka jingïakynduh bad u Gadkari ha Delhi, ha kaba ki la ïakren ïa kiba bun ki mat, khamtam ha kaba ïadei bad ki Road Project ha Mizoram.
Ha ka por ba la don ka jingïalang, u Lalduhoma u la buh ka jingkyrpad ïa u Gadkari na ka bynta ban ailad ha ka ban ïoh ban pyntreikam sted ïa kane ka Project ba dang thmu pyntreikam hapoh ka Road Transport and Highways (MoRTH) bad pynpaw ruh ïa ki jingjulor kiba la wanrah da ka National Highway Infrastructure Development Corporation Limited (NHIDCL) ha ka por ba la shna ïa ka surok ha ka jylla.
Kum shi bynta ban ai jubab halor ka jingkyrpad jong u Myntri Rangbah, u Nitin Gadkari u la mynjur ban ai T. 1313.28 klur ha kaba la mang na ka bynta ka Twin Tube Uni-directional Aizawl Bypass Tunnel.
Kane ka pisa kan ïaid ha kaba ïadei bad ka jingshna ïa ka lynti krem kaba jrong 2.5 km ha National Highway No. 6 hapdeng ka Sairang bad Phaibawk, ha ryngkat ka surok kaba 2.1 km.
