Aizawl, K’lyngkot:
Ki pulit jong ka Mizoram ki la ïoh ban pynpulom ïa ka jingthmu khaïi tuh ïa u kwai tyrkhong hadien ba ki la ïoh khubor halor kane. Hadien ba la ïoh jingtip, ka kynhun jong ki pulit ha ka 14 tarik, ki la pynlong ïa ka jingleit khynra ha ka thaiñ Bilkhawthlir, ha kaba la ïoh ban kurup ïa 90 tylli ki byrni jong kine ki kwai ba la khang pyrshah ban khaïi beaiñ na kawei ka trok kaba don ïa u Registration Number AS-11-CC-2202.
Ka jingpynsted ha ka jingpyntreikam da ka kynhun jong ki pulit, ka la pynlong ïa ki ban ïohkem ïa arngut ki nongñiah trok bad u trai jong kane ka kali. Ha kawei pat ka jingjia, u Superintendent of Police (SP) Serchhip bad ka kynhun jong u ki la ïoh ban kurup ïa 7 tylli ki trok kiba la don bynta ha ka ban khaïi shabar ri ïa u kwai tyrkhong.
Khlem da pynslem hadien ba la ïoh jingtip halor ka jingjia, u SP jong ka Serchhip bad ka kynhun jong u ki la leh ïa kaba donkam, ha kaba kane ka la pynlong ïa ki ban kem ïa kine ki nongpynkheiñ aiñ hajan Thentlang ha ka por 7:30 janmiet ha kajuh ka sngi.
Kane ka jingpynlong jong ki pulit ka Mizoram ïa ka jingleit khynra ka long shi bynta ban khanglad bad ban pynduna ïa ki kam khaïi beaiñ ïa u kwai tyrkhong.
