Imphal, K’lyngkot:
U Myntri Rangbah jong ka Manipur u N Biren Singh u la leit jngoh ïa ki longïing jong saw ngut ki nongshong shnong kiba la shah pynïap ha ka por ba ki dang leit thoh dieng.
Kane ka jingjia ka la jia ha Terakhong Makha Leikai Akasoi kaba don ha Bishnupur District.
Ha ka jingai jingkren ha ki lad phah khubor ha ka 14 tarik, Kyllalyngkot, u Myntri Rangbah u la pynpaw ka jingsngewlem sha kine ki longïing kiba la ïohmad ïa kane ka jingjia basngewsih. U la ong, “Nga pynpaw ka jingsngewlem bad duwai na ka bynta kine ki longïing kiba la ïakynduh jingeh khnang ba kin lah ban shah ïa kine ki jingeh bad ïoh jingtngen. Ai ba ka mynsiem jong kine kiba la leit noh kan jahthait ha ka jingsuk.”
Ym tang katne, u Myntri Rangbah ka jylla nalor ba u la leit sngewlem, u la kular ruh ban ai ka jingïarap bad ka jingkyrshan sha kine ki longïing. U Singh u la ong ba ka sorkar kan sa pynbiang ïa ki jingdonkam sha kine ki longïing khnang ba kin lah ban im bha na ka jingktah jong kane ka jingjia.
