Guwahati, K’lyngkot:
U Myntri Rangbah jong ka Assam u Himanta Biswa Sarma u la pynbna paidbah ïa ka skhim kyrshan pisa na ka bynta ki longkmie kiba dei shi bynta jong ki kynhun ba ïeng ha la ki jong ki kjat ne ki Self-Help Group.
Ha ka jingai jingkren sha ki nongthoh khubor, u Myntri Rangbah ula ong ba ka sorkar kan sa wanrah ïa ka skhim na ka bynta ki longkmie kiba don ha ka Self-Help Group kiba dei ki nongshong shnong ha ki thaiñ nongkyndong.
Ïa kane ka skhim yn sa jer da ka Chief Minister’s Women Entrepreneurs Scheme.
U Sarma u la ong ba lyngba kane ka skhim ki la kwah ban pynkylla ïa ka jingim jong ki longkmie kiba na ki thaiñ nongkyndong sha ki nongtrei karkhana halor ka jingthmu ban kyntiew ïa ka ïoh ka kot jong ki.
U la ong ruh ba lyngba kane ka skhim ki longkmie kin sa ïoh jingïarap ha ki lai tylli ki bynta.
“Ha ka bynta kaba nyngkong, kine ki longkmie kin sa lah ban wanrah ïa ka jingthmu jong ki ha ki kam khaïi. Ki lah ruh ban thmu pyntreikam ha ka kynhun ban pynïaid shakhmat ïa ka kam khaïi jong ki. Wei ba ki la dep ban phah ïa kine ki jingthmu pyntreikam sha ngi bad lah ban pyndap ïa ki phom, ka sorkar kan sa phah ïa ka pisa kaba T. 10,000 ha ki Bank Account jong ki ha u snem banyngkong. Kumta la ong ba kin sa don kumba 39 lak ngut ki longkmie ki ban sa ïoh T. 3,900 klur na ka sorkar,” la ong u Sarma.
U Myntri Rangbah jong ka jylla u la ong ba ka sorkar kan sa wad ïa ka jingtip kaba bniah la kine ki longkmie kin lah ne em ban pynïaid ïa ki kam jong ki ha ka ban khaïi khnang ban pyntikna ba ka pisa ba la ai kam dei ban shu lehnohei.
