Agartala, K’lyngkot:
Ki la don kumba 8 ngut ki lehnoh kiba la ïatreilang bad ar tylli ki kynhun lehnoh jong ka Nationalist Liberation Front jong ka Tripura kiba la leit ban pyndem hakhmat ki pulit jong ka Tripura bad ki shipai ka tnat Border Security Forces.
Na kine lehnoh la ïoh ban kurup katto katne ki tiar siat bad ki kuli hadien ka jingkhmih bniah ïa ki.
Ka jingthoh kaba la wan na ki pulit jong ka Tripura ka la ong ba ki la don kumba san ngut ki lehnoh jong ka kynhun NLFT ba la lamkhmat da u Parimal Debbarma kiba la leit ban pyndem ïalade hakhmat ki pulit ha kaba ki la rai ban im noh ka jingim kaba bha.
Ïa kine ki lehnoh kiba la leit ban pyndem, la tip kyrteng kum u Netajoy Reang Naising (33), Mohonda Reang Salthang (36), Sukurnar Reang Sinai (27), Kiranjit Reang Berem (20) bad u Bishnuram Reang Balkang (25).
Kine baroh ki dei na kiba bun ki thaiñ kiba don ha ki distrik jong ka North Tripura, khamtam na ki thaiñ ha ki bynta jong ka Kanchanpur Subdivision.
U DIGP Intelligence u Krishnendu Chakravertty u la ong ba kine ki la sah ha Bangladesh ha ki ktem jong kine ki lehnoh ka kynhun.
Ha kaba ïadei bad kane, ki la don shuh sa lai ngut ki lehnoh kiba la ïatreilang bad ka kynhun NLFT jong u Biswa Maohan kiba la leit ban pyndem hakhmat ki BSF ha Chawmanu kaba don ha Dhalai distrik jong ka Tripura.
Ïa kine kiba la leit ban pyndem la tip kyrteng kum u Ranjan Tripura ba la tip ruh da ka kyrteng kum u Gondla (28), u Chitanjoy Tripura (38), bad u Raban Joy Tripura (28). Kine baroh ki dei ki nongshong shnong jong ka Dhalai distrik jong ka Tripura.
