Mawkyrwat, K’Lyngkot 22
Ki paidbah nongrep jong ka dong ka thaiñ Ranikor ha ryngkat ka seng Ranikor Area Farmers Association kaba dei ka seng kaba peit ïa ka bha ka miat jong ki nongrep, namar ka jingsngew sohsat palat halor ka jingshah pynjot ki jingthung jingtep na ka por sha ka por ha ki hati khlaw, ki la shim ïa ka rai ban siat ïap noh shisyndon ïa kine ki hati.
Ïa kane ka rai la shim ha ka jingïalang kaba kyrkieh kaba la pynlong ha ka 20 tarik mynta u bnai ha shnong Photkroh bad Nongnah, South West Khasi Hills District.
Ha kane ka jingïalang la wan ban ïashimbynta da ki paidbah nongrep na ka thaiñ Nongnah, Nongïohijngai, Dirang, Mawlangbah, 18 Mer bad kiwei ki shnong ba marjan. Ha katei ka jingïalang ki paidbah da kawei ka sur ki la rah ïa ki kti kum ka dak ka jingmynjur bad ki la rai ban leit pynïap noh shisyndon ïa kitei ki hati khlaw.
U Bah Micheal Donald Lyngdoh, President ka RAFA haba ai jingkren u la ong ba ka seng ryngkat ki nongrep ha kine ki arsnem ba la dep man ka por ki la ju leit ban ujor sha ka tnat Wild Life kumjuh ruh ha u DC jong ka South West Khasi Hills District ban pynkynriah noh ïa ki hati kiba la pynjot dusmon ïa ki jingthung jingtep kumjuh ruh ïa ki ïing ki sem hynrei katei ka kam ka khlem poi shaei-shaei bad ka la shu kut tang ha ki jingkular, wat la na ka liang ki nongrep ki la dep byrngem teng ban pynïap ïa kitei ki hati
U Bah Donald u la ïathuh ba ki hati mynta ki la wan pynjot biang ïa ki kwai, tympew, ki diengsoh bad ïa u synsar bad ki la sdang sa ban beh bad pynher syrngiew sa ïa ki nongrep kiba thmu ban leit kheit synsar haduh ba bun ki nongrep mynta kim nud shuh ban leit sha ki lyngkha namar kitei ki hati ki la sdang ban kthong sa ïa ki briew.
Nalor u Bah Donald Lyngdoh kiwei ki nongkren ha kane ka sngi ki kynthup ïa u Bah Kyrmen Ryja, Secretary, RAFA, Apualus D Sangma, Bah Romoland Paliar bad kiwei kiwei.
