Shillong, Rymphang 13
Ka BJP Meghalaya hapoh ka jingïalam u Bah Sanbor Shullai, MLA ka South Shillong ka la ïakynduh ïa u Myntri ka Sorkar Pdeng ba khmih ïa ka Minority Affairs u Kiren Rijiju bad kyrpad ban kyntiew kyrdan noh ïa ka Red Cross Hospital, Laban namar ba ka dei ka jaka ai jingsumar kaba la rim bad la donkam ban tei noh da ka ïing paki kaba thymmai.
Ha kane ka sngi la synran lang ïa u Bah Sanbor Shullai da u President ka BJP Meghalaya u Rikman Momin lem bad kiwei bad ha kane ka jingïakynduh ïa u Kiren Rijiju, ki la ïoh ban aiti ïa ka jingtyrwa ban kyntiew noh ïa ka Red Cross Hospital, Laban.
U Bah Sanbor Shullai u la pynpaw ba ka Red Cross Hospital kaba don ha ka South Shillong Constituency ka donkam ban tei thymmai noh khnang ba da ki hajar ngut ki longïing baduk kin lah ban bteng ban ïoh ïa ka jingsumar kaba paka.
U la bynrap ba dei ha kane ka hospital ba la kha ïa u, kumta dei ban pynlong ïa ka kum ka hospital kaba biang tam ban kha khunlung hapoh ka nongbah Shillong.
U MLA u la pynpaw ruh ba ha katei ka jingïakren, u Myntri ka Sorkar Pdeng u la pyni ïa ka jingkloi ban tei thymmai ïa katei ka hospital bad ban aiti ïa ka Detailed Project Report sha ka Minority Affairs hadien ka ilekshon.
Kane ka kynhun jong ka BJP kala pyntip ba kan sa leit ïakynduh noh shen ïa u Myntri Rangbah ka jylla ban kyrpad ïa u ban phah ïa ka jingtyrwa sha ka Minority Affairs jong ka Sorkar Pdeng.
U Bah Sanbor u la kular ba yn ïaleh ban pynurlong shisha ïa ka jingpynkylla ïa kane ka hospital hapoh kane ka samoi treikam ka jong u. U la ban jur ruh ba dei ban trei bun ïa ka kam bad ban kren duna bad kane ka dei ban long ka buit ha ka kam saiñ pyrthei.
