![Ka jingbit kam wan beit-beit na ka Sorkar: Conrad conrad](https://unongsainhima.com/wp-content/uploads/2024/01/conrad-1-720x494.jpg)
Shillong, K’lyngkot 23
Ka Sorkar Jylla ka la pynshai ba ka jingbym lah ban pynlong jingïalang u nongïalam ka Congress u Rahul Gandhi ha University of Science and Technology Meghalaya ha Ri Bhoi district kum shibynta jong ka Bharat Jodo Nyay Yatra, ka dei namarba khlem don ka jingpan jingbit kaba biang.
Na ka liang u Myntri Rangbah Conrad K Sangma, u la ong ba um don jingtip bha shaphang kane, tangba katkum ka jingsngewthuh ka long ba ka jingbit kam wan beit-beit na ka Sorkar hynrei na ki bor district.
Kumta u la ong ba na kaei kaba mih la sngewthuh ba ym don kano-kano ka jingai jingbit la ka dei na ka USTM ne na u Rangbah Shnong jong ka jaka kumba ju dei ka rukom ïa baroh ki seng saiñ pyrthei kiba kwah ban pynlong kano-kano ka prokram.
Haba kylli halor ka jingkren u Rahul Gandhi uba la ong ba u Amit Shah u la ong ba ka Sorkar ha Meghalaya ka dei kaba bamsap tam hynrei ki ïatreilang kumjuh, u Conrad u la ong ba um kwah kynthoh eiei namar kum kine ki jingkren ki dei ki jingkynthoh saiñ pyrthei bad ai ba kin batai hi kita.
Haba kylli kaei u don ban ong namar ka Congress ka donlang ha KHADC ban thaw ïa ka Executive Committee ha KHADC, u Conrad u la ong ba kata ka long kaba dei tangba um kwah ong ne pynphai eiei ïa kaba kynthoh da kiwei.