Srinagar, Jylliew:
U nongïalam ba ha khlieh jong ka kynhun lehnoh Lashkar-e-Toiba (LeT) u la long uwei napdeng ar ngut ki lehnoh kiba la shah pynïap ha ka jingïasiat kaba markylliang bad ki shipai kaba la jia ha Pulwam kaba don ha ki bynta shaphang Shathie jong ka Kashmir ha ka Lah Sngi U Blei, la ïathuh ka tyllong khubor.
Ka jingïasiat kaba markylliang ka la sdang da ka jingïatreilang hapdeng ka kynhun jong ki pulit ka Jammu & Kashmir, ki shipai bad ki pulit jong ka tnat Central Reserve Police Force (CRPF) ha kaba ki la kerkut ïa ka shnong Nehama kaba don ha Pulwama ha ka step jong ka Lah Sngi U Blei hadien ba la ïoh jingtip shaphang ka jingdon jong ki lehnoh ha kane ka shnong.
Kumba la ïathuh ka tyllong khubor, la ong ba ki la don ar ngut ki lehnoh kiba la shah pynïap ha ka por ba la don ka jingïasiat bad ki shipai kiba la tip kyrteng kum u Riyaz Ahmad Dar bad u Rayees Ahmad.
U Dar, uba long u nongshong shnong jong ka Kakapora, une u la leit ban pynïasoh bad kane kynhun lehnoh ha ki phra snem ba la leit.
U la long ruh uwei na ki dkhot kane kynhun lehnoh uba la trei borbah bha ha ka thaiñ. Kumba la ïathuh ka tyllong khubor kaba la wan na ki pulit, la ong ba u Dar u la shah pynngat kyrteng ha ka kynhun ‘A’ jong ki lehnoh ha ka jingbuh jingthoh jong ki pulit, bad une u la lah ban lait tuh na kiba bun ki jingkhang kdong jong ki kynhun shipai ha ki por ba la leit.
U Ahmad ruh u la shah buh kyrteng ha ka kynhun ‘A’ jong ki lehnoh ha ka jingbuh jingthoh jong ki pulit, la ïathuh ka tyllong khubor. Ka jingïasiat kaba markylliang kaba la jia ha ka Lah Sngi U Blei ka la mih haba ka kynhun ba la ïatreilang hapdeng ki shipai bad ki pulit ki la pynibor pyrshah ïa ki lehnoh kiba don ha ka ïing ba ki la pynlong jaka rieh bad pyrshang ban phet bad ïaleh ban lait na ka jingshah kerkut ha ka kynhun jong ki shipai da kaba siat khlem sangeh, la ïathuh ka tyllong khubor ha kaba la bynrap shuh shuh da kaba ong ba na ka liang jong ki shipai ruh ki la pynphai kylla da kaba siat bad khanglad ïa ka jinglait phet jong ki lehnoh.
Haba ki shipai ki la pyndonkam da ki tiar siat kiba kham khlaiñbor ban siat ïa ka ïing ba ki lehnoh ki la pynlong jaka rieh, kane ka ïing ka la kem ding, ha kaba ka jingpluh ka la pur sa sha ka ïing ba marjan.
Haba ka jingsiat ka la sangeh bad pyllip ïa ka ding, ki shipai ki la pynlong ïa ka jingleit jurip bniah ha kaba ki la lap ïa kine ki ar tylli ki metïap jong kine ki lehnoh.
