Shillong, Jylliew:
Ka jingtrei shitom jong ka RSS-BJP ha Kerala ka la sei ïa u soh bathiang namar ha ka sien kaba nyngkong eh ka la ïoh ban plie kitab ha kane ka ilekshon Lok Sabha ha Kerala naba u Suresh Gopi uba dei u tyngshop ba la kylla nongïalam seng saiñ pyrthei u la ïoh ka jingjop na ka Thrissur constituency.
Kane kan dei ka jingjop kaba khraw naba ka la plie ïa ka jingkhang ïa ka BJP ban ïoh bsuh khlieh ha Kerala. Ka BJP ka la lah ban kyntiew ïa ka bhah ïoh ‘vote’ da 3% kata ban ïoh haduh 17% ha kane ka ilekshon 2024 na kaei kaba ka la ïoh ha u 2019.
U Gopi u la lah ban pynliem noh ïa u kyrtong ka Communist Party of India (CPI) u Advocate VS Sunil Kumar da 74,686 ‘vote’.
Hynrei ka jingsngewsih kaba khraw ïa ka BJP ka long ba u Myntri ka Sorkar Pdeng u Rajeev Chandrashekhar u la shah pynliem noh ha u Shashi Tharoor ka Congress ha Thiruvananthapuram da 16,000 ‘vote’.
