Bhubaneswar, Jylliew:
Kum shi bynta ban pynpaw ïa ka jingkut noh jong ka jingsynshar jong u kaba la 24 snem ha ka jylla Odisha, u heh nongïalam jong ka seng BJD u Naveen Patnaik ha ka Sngi Balang u la hiar noh na ka shuki Myntri Rangbah hadien ka jingshahrem ka seng jong u ha ka jingïakhun ïa ka ilekshon Assembly ha ka jylla.
U Patnaik u la aiti noh ïa ka shithi iehnohkam sha u Lat ka jylla u Raghubar Das ha Raj Bhavan, la ïathuh ka tyllong khubor. Ka seng BJP ka la ïohlad ban shimti ïa ka jingsynshar ha Odisha da kaba ïoh ïa ka jingjop ha ki 78 tylli na ki 147 tylli ki Assembly konstitwensi, katba ka seng BJD ka la jop tang 51 tylli.
Ka seng Congress ka la jop ha ki 14 tylli ki konstitwensi bad ka seng CPI (M) tang kawei, lai ngut ki kyrtong shimet kiba la ïakhun ha kane ka ilekshon ki la ïoh ïa ka jingjop.
