New Delhi, Jylliew:
Ka seng Aam Aadmi Party ka la ong ba kan sa ïakhun hi ïa ka ilekshon Assembly ban wan ha Delhi dalade bad kan ym ïatreilang bad ka seng Congress, la pyntikna u Gopal Rai, u heh nongïalam jong ka seng.
Kane ka seng dang shen ka la dep ban ïakhun ïa ka ilekshon Lok Sabha bad ka seng Congress kum shi bynta jong ka kynhun synrop INDIA kam shym la jop wat tang na kawei ruh ka konstitwensi ha ka nongbah ha kaba ka seng Bharatiya Janata Party ka la ïoh ïa ka jingjop ha baroh 7 tylli ki konstitwensi.
U Rai kumba la pynpaw da ka lad phah khubor u la ong: “Ka jingïatreilang ka la long tang na ka bynta ka jingïakhun ha ka ilekshon Lok Sabha.” “Kane ka la paw shai naduh basdang ba ïa ka kynhun synrop INDIA la thaw na ka bynta ban ïakhun ha ka ilekshon Lok Sabha. Naba dang don ka jingpyrkhat na ka bynta ka State Legislative Assembly ne ka Vidhan Sabha, kan ym don kano kano ka jingïatreilang bad kiwei ki seng. Ka seng Aam Aadmi Party kan sa ïakhun na ka bynta ka ilekshon dala ka bor lajong,” u la ong.
