New Delhi, Jylliew:
U Pawan Khera kum u nongïalam jong ka seng Congress bad u In-charge jong ka Media and Publicity Department u la ong, ki la don kumba lai tylli ki kam thombor jong ki lehnoh ba la jia ha ki lai sngi ba la leit ha ka thaiñ J&K.
U la ong, ha ka sngi Balang, kiba kum kine ki jingjia ki la sdang ha ka por ba ka seng BJP ka la pynshisha ba ka jingsuk ka la leit phai bad kiei kiei baroh ki la ïaid beit ïaid ryntih ha Jammu & Kashmir.
U Khera u la buh jingkylli ruh ha kaba ïadei bad ka jingsngap jar jong u Myntri Rangbahduh u Narendra Modi ha kaba ïadei bad kane ka jingjia. Katkum ka kaiphot ba la ïohlum, la ong ba u Modi u la don por ban ïakren halor ki nongïalam jong ka ri Pakistani, hynrei um don por pat ban ong ei ei ne ban pynrem halor ki kam thombor kiba shyrkhei.
Kine ki jingkren jong u Khera ki la long naba ki kam pyntriem jong ki lehnoh ki la nang jur ha ki ar tylli ki distrik kiba don ha ka bynta khappud kata ha Rajouri bad Poonch.
