New Delhi, Jylliew:
Ki la don kumba 28 ngut ki Myntri ha ka sorkar jong u Narendra Modi jong ka samoi treikam balai kiba la don ïa ki mukotduma kiba long pyrshah ïa ki ha kaba 19 ngut napdeng jong ki dei kiba la shah mudui halor ki kam beaiñ kiba kham shyrkhei kum ha ki jingjia jong ki jingthmu pynïap briew, ki kam sniew pyrshah ïa ki kynthei bad kumjuh ki jingkren kiba ktah matïong ïa kiwei pat, la ong ka Association of Democratic Reforms (ADR) ka kynhun ba ju khmih bniah ha ka liang ki kam ilekshon.
Napdeng kiba bun ki Myntri kiba la shah mudui mukotduma halor ki kam sniew ba kham triem, ki dei arngut ha kaba kine ki la shah kynnoh ba ki la thmu ban pynïap briew bad shah pynngat hapoh ka kyndon Indian Penal Code section 307. Kine ki kynthup ïa u Shantanu Thakur, u Myntri khynnah uba dei khmih ïa ki Port, Shipping and Waterways, bad u Sukanta Majumdar, u Myntri khynnah uba dei khmih ïa ka tnat pule-puthi bad ka Development of North Eastern Region, la ong ka ADR.
Katkum ka kaiphot ba la wanrah da ka ADR la paw ruh ba ki la don kumba san ngut ki Myntri kiba la don ïa ki jingshah ujor mukotduma kiba ïadei bad ki kam sniew kiba long pyrshah ïa ki kynthei. Kine ki kynthup ïa u Minister of State (MoS) for Home u Bandi Sanjay Kumar, u Thakur, Majumdar u MoS for Petroleum and Natural Gas bad u Myntri ka tnat Tourism u Suresh Gopi bad u Myntri ba dei khmih jong ka Tribal Affairs u Jual Oram.
Shuh shuh, ka kaiphot jong ka ADR ka la ïathuh ba ka la ithuh ruh sa ïa 8 ngut ki Myntri kiba don ïa ki mukotduma pyrshah ïa ki ha kaba ïadei bad ki jingkren kiba ktah bad pynmong ïa kiwei pat. Baroh ki la don kumba 28 ngut na ki 71 ngut ki Myntri kaba long da kumba 39 per cent kiba la shah pynshisha ba ki la shah mudui halor ki kam beaiñ kiba long pyrshah ïa ki, la ong ka kaiphot. Ka kynhun Myntri kaba thymmai kaba la bam smai ha ka 9 tarik, Jylliew ka la don ïa 72 ngut ki dkhot, kynthup u Myntri Rangbahduh u Narendra Modi.
