Hyderabad, Jylliew:
Ka kynhun jong ki shipai, ka la lap ïa 70 tylli ki ‘liewlep ba la pynap bad riam da ki lehnoh Maoist ïa ki pulit bad ïa ki shipai ïada ri ha ka khlaw Pusuguppa kaba don ha ka thaiñ Cherla ha Bhadradri Kothagudem distrik ha khappud Telangana-Chhattisgarh.
Ki kynhun ba la pyntreikam kyrpang kiba kynthup ïa ka CRPF ba la lamkhmat da ki pulit jong ka Cherla ki la lap ïa kine ki ‘liewlep ba la pynap da kumba 4,396 tylli ki khnam nar ba la kheiñlang hadien ba la lap na kine ki thliew, la ong u SP u Rohith Raju.
Na ka daw jong ka jingtep ïa ki bom IED bad ka jingdon jong kine ki jingriam ba la pynap da ki lehnoh Maoist ha kiba bun ki thaiñ ha kaba ki riewlum ki shong shnong, kiba bun na ki mrad bad ki briew kiba ïaid na kine ki jaka ba la pynap da ki lehnoh, ki ju duhei ïala kajong ka jingim bad don ruh kiba ju mynsaw jur kumba la sakhi na ki jingjia kiba dang jia shen.
Ka jingïakhun pyrshah jong ki kynhun shipai ïa ki lehnoh ka dang ïai bteng bad ïa kane la sakhi ha ka jingjia ba dang shen ba la jia ha ka Sngi Thohdieng jong ka taïew ba la lah ha kaba ki la don kumba 7 ngut ki lehnoh kiba la don bynta ha ka jingïasiat kaba markylliang bad ki shipai, ki la shah siat ïap, kane ka jingjia ka dei kaba la jia ha Narayanpur distrik, kaba don ha ka thaiñ Bastar jong ka Chhattisgarh.
Ki la don kumba lai ngut ki shipai kiba la mynsaw ha kane ka jingïakhun pyrshah ïa ki lehnoh. Shuh shuh la ïathuh ba ki lehnoh ki la siat ruh ïa uwei u nongshong shnong ha Kondagaon, Chhattisgarh, ha kaba ki la kynnoh ïa u ba u la long u nongai khubor sha ki pulit shaphang jong ki.
Kane ka kam pynïap briew ka la jia ha ka sien kaba ar ha Bastar Division tang ha ka shi taïew. Ki lehnoh kiba la shah siat ki la shah thong ha ka khlieh jong ki da T. 38 lak, la ïathuh ki pulit. Kane ka jingpyntreikam ka la long ka jingjop kaba khraw na ka bynta ki shipai pyrshah ïa ka kynhun , People’s Liberation Guerrilla Army (PLGA) Company no 6, kaba la shah ñiew ba ka la long ka kynhun ba khlaiñbor ha ki kam ïakhun pyrshah jong ki Naxal, la ïathuh ki pulit.
Ka jingïasiat kaba markylliang ka la jia hajan ka shnong Gobel bad Thulthuli kiba hap hapoh ka jingkhmih jong ki pulit ka Orcha ha ka sngi Thohdieng.
Napdeng ki 7 ngut ki lehnoh kiba la shah siat ïap, lai ngut ki dei ki kynthei. Kine kiba la shah pynïap ki dei jong ka kynhun Number 6 jong ka People’s Liberation Guerrilla Army (PLGA) bad ka kynhun nongseng jong ka kynhun Bastar Division jong ka kynhun lehnoh Communist Party of India (Maoist), la ïathuh u heh pulit.
“Ha ka jingpyntreikam la don bynta lang da ki kynhun jong ki shipai ïada ri ïa kaba la pynlong naduh ka miet jong ka 6 tarik, Jylliew ha ki bynta khappud jong ka Narayanpur, Kondagaon, Dantewada bad Bastar distrik hadien ba la ïoh jingtip shaphang ka jingdon jong ki lehnoh Maoist jong ka kynhun PLGA Military Company no. 6 bad East Bastar Division Formation,” la ong u Inspector General of Police (Bastar Range) u Sundarraj P ha ka jingïakren bad ki nongthoh khubor.
Ka kynhun jong ki pulit na District Reserve Guard na ki saw tylli ki distrik, ka kynhun 45th Battalion jong ka Indo-Tibetan Border Police (ITBP) bad ka kynhun 95th Battalion jong ki Central Reserve Police Force (CRPD) ki la don bynta ha kane ka jing-leit thwet lehnoh, u la ong.
