Chennai, Jylliew:
U Myntri Rangbah jong ka Tamil Nadu u MK Stalin u la pyntikna da kaba ong ba ki la don kumba 7 ngut ki nong Tamil kiba la ïap na ka daw jong ka jingpluh ding ba shyrkhei kaba la jia ha kawei ka ïing bun mala kaba don ha Kuwait.
Kum shi bynta ban pynpaw ïa ka jingsngewlem sha ki bahaïing jong kine ki lanot, u Stalin u la pynbna ïa ka jingnongsynñiang kaba long mar T. 5 lak sha kine ki longïing.
Ha ka jingthoh ba la phah, u Myntri Rangbah u Stalin u la ong ba da ka jingïarap jong ka Indian Embassy ha Kuwait bad kiwei pat ki kynhun seng jong ki nong Tamil, ïa ki metïap jong kine kiba la ïap na ka jingpluh ding la lah ban pynpoi ha Tamil Nadu ha ka liengsuiñ jong ki riewshimet.
U la bthah ruh ïa ka Department of Welfare of Non-Resident Tamils ban pyntikna ha ka ban pynbiang ïa baroh ki jingdonkam sha ki briew kiba na ka jylla kiba dang shah sunar ha Kuwait na ka jingmynsaw ha kane ka jingjia.
Ïa kine ki lanot kiba la duhnoh ïa ka jingim ha ka jingjia la tip kyrteng kum u Veerachamy Mariappan na Thoothukudi distrik, u Krishnamoorthy Chinnadurai na Cuddalore distrik, u Govindan Shivshankar na Chennai, u Raju Ebamesan na Trichy distrik, u Bhunaf Richard na Thanjavur distrik, u Karupannan Ramu na Ramanathapuram distrik bad u Mohammed Sharief na Villupuram distrik.
Ki la don 45 ngut ki nong India napdeng ki 49 ngut kiba la ïap na ka jingpluh ding kaba la jia ha Kuwait ha ka miet jong ka sngi Ba-ar.
