Mumbai, Jylliew:
Hadien ka jingïakhun ïa ka ilekshon Lok Sabha kum u dkhot ba paw jong ka kynhun synrop ka liang pyrshah ka INDIA, u Uddhav Thackeray uba lamkhmat ïa ka seng Shiv Sena (UBT) u la pynpaw ïa ka jingthmu ba ka seng kan sa ïakhun hi marwei ha ka ilekshon Assembly ka ban sa long ha Maharashtra, la ïathuh ka tyllong khubor.
Ka seng Shiv Sen (UBT) ka la khmih bniah ruh na ka bynta ban jied ïa ki kyrtong ban ïakhun ha ka ilekshon Assembly ha ka jylla.
Ha ka taïew ba la dep ha ka jingïalang ba la pynlong ha Sena Bhavan, u Uddhav Thackeray u la bthah ruh ïa ki heh jong ka kynhun seng ha baroh kawei ka jylla ba ki la dei ban phah ïa ka kaiphot halor ka phang ba kaei ka ban jia lada ka seng ka rai ban ïakhun marwei ha ka ilekshon Assembly, lane ban ïakhun lang bad ki seng jong ka kynhun INDIA.
Ha ka ilekshon ba dang kut shen jong ka Lok Sabha, ka kynhun synrop ka liang pyrshah INDIA ka la mih shakhmat ban ïakhun ha kaba ka la jop ha ki 30 tylli ki konstitwensi, katba ka kynhun NDA ka la lah ban wanrah jingjop tang ha ki 17 tylli ki konstitwensi.
U kyrtong shimet ruh u la jop ha kawei ka konstiwensi ha ka bynta ba shaphang Sepngi jong ka jylla.
U Uddhav Thackeray u la pan ïa ka kaiphot ban tip bniah la ki nongkitkam jong u kyrtong ka seng bad u kyrtong jong ka seng ba la ïatreilang ki la ïatreilang ne em ha ka jingïakhun ïa ka ilekshon Lok Sabha.
Ha kaba ïadei bad kane, u Raj Thackeray uba lam khmat ïa ka kynhun Maharashtra Navnirman Sena (MNS), kaba la pynbna ban ai jingkyrshan ïa ka kynhun NDA ha ka ilekshon Lok Sabha, u la pynbna ba ka seng kan sa ïakhun da 200 haduh 225 tylli ki konstitwensi ha ka ilekshon Assembly.
Ïa ka ilekshon Assembly na ka bynta ki 288 tylli ki konstitwensi jong ka Maharashtra la thmu ban pynlong kham hadien jong une u snem ba mynta.
