New Delhi, Jylliew:
Naba ka nongbah Delhi ka la ïakynduh jingeh na ka jingbym lah ban pynbiang ïa ka umbam umdih khamtam ha kane ka por shit, ka seng Bharatiya Janata Party (BJP) ka la ïai bteng ban pynlong ïa ka jingïakhih ban pyrshah jur ïa ka seng Aam Aadmi Party (AAP) kaba lamkhmat ïa ka sorkar ha Delhi ha kylleng ka nongbah ha ka sngi kaba ar haduh hynnin ka Lah sngi U Blei.
Ki MP jong ka seng BJP, ki MLA bad u heh nongïalam jong ka seng ha ka jylla u Virendra Sachdeva ki la ïashim bynta ha kane jingïakhih ba la pynlong ha ki 52 tylli ki shnong kiba don ha kylleng jong ka nongbah, kynthup hajan ki shlem treikam jong ka seng AAP bad jong ka Delhi Jal Board (DJB). Ha kane ka jingïakhih, ki nongïalam bad ki nongbud jong ka seng BJP ki la rah da ki khiew ban pyni ïa ka jingpyrshah jur halor ka jingkyrduh um.
Katba ka seng BJP ka la kynnoh ïa ka sorkar ba kam lah ban leh ei ei ha ka ban pynbiang um, ka seng AAP ka la kynnoh kylla ba ka jingkyrduh um ha Delhi ka la long na ka daw jong ka seng BJP. U MP jong ka seng AAP ha Rajya Sabha u Sanjay Singh u la ong ba ka seng BJP ka la kwah ban pynlong kam saiñ pyrthei halor kane da kaba pynshisha ba ki briew jong ka Delhi ba kim ïoh um.
“Ka seng BJP lyngba ka sorkar Haryana jong ka ka la nang pynduna ha kaba ïadei bad ka jingpynpoi um na ka bynta ka Delhi, ki Pipeline baroh ki la shah pynjulor lut bad hadien kane kin sa pynlong ïa ka jingïakhih ha ki jaka treikam jong ka DJB,” u la ong.
Kum shi bynta ban ïashim bynta ha ka jingïakhih ha Block-8 Geeta Colony kaba don ha Krishna Nagar, u Virendra Sachdeva u la ong, “ki briew kim shym ïoh pahuh ïa ka um namar ka jingjyllei jong ki nongtuh bad ka jinglait kai ka um. Ha ka jaka ban trei na ka bynta ban pynbiang ïa ka jinglait kai jong ka um, bad ka jingbun jong ki nongtuh, ka seng AAP ka la kdew kti bad kynnoh pyrshah halor ka jingbym lah ka seng ban pynpoi um.” Ha kawei pat ka jingïakhih kaba kum kane, ha ka thaiñ Karol Bagh, u MP jong ka seng BJP na North West Delhi u Yogender Chandolia u la ong ba ka seng AAP ka la kynnoh bymhok pyrshah ïa ka seng BJP ba ki MP jong ka kim treikam bha.
“Ka sorkar Delhi kam shym la lah ban treikam ei ei. Baroh ki MP jong ka seng BJP ki don ha ka bynta ban treikam. Shano ki MP jong ka seng jong ki ha Rajya Sabha bad ki 62 ngut ki MLA? Ki briew jong ka Delhi ki la kwah ïa ka jingpynpoi um na ki, bad ki la pyrshang ban phaidien noh na kine ki mat ba kongsah,” u la bynrap.
Ha ka jingai jingkren ha ka jingïalang bad ki nongthoh khubor ha kaba ïadei bad kane ka mat, u Sanjay Singh u la ong, “Ka seng BJP ka la pyntreikam ïa kiba bun ki skhim bad ki jaka na ka bynta ban ïaleh pynbiang ïa ka jingkyrduh um ha Delhi. Ka Delhi ka la ïoh um na Haryana bad ka jingmang na ka bynta ban pynbiang um sha ngi kam shym la poi ha kaba kane ka la wanrah ïa ka daw jong ka jingkyrduh um.”
